އިއްޔެ ބޭއްވި ރައްޔިތުންގެ މަޖިލީހުގެ އެމްޑީޕީގެ ޕްރައިމަރީ ކާމިޔާބު ކުރެއްވި ބޭފުޅުންނާއި އެކު މަޖިލިސްގެ ގޮނޑިތަށް ކާމިޔާބު ކުރުމަށް، ޕްރައިމަރީގައި ވާދަކުރެއްވި އެހެން ބޭފުޅުންވެސް އެކުގައި މަސައްކަތް ކުރެއްވުމަށް އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެދިވަޑައިގެންފިއެވެ.

އެމަނިކުފާނު މިކަމަށް އެދިވަޑައިގެންނެވީ އިއްޔެ ބޭއްވި އެމްޑީޕީގެ ޕްރައިމަރީ ކާމިޔާބު ކުރެއްވި ބޭފުޅުންނަށް މަރުޙަބާ ދަންނަވައި އެކްސްގައި ކުރެއްވި ޕޯސްޓްގައެވެ.

ރައީސް ސާލިޙް ވަނީ އިއްޔެ ބޭއްވި، ޕްރައިމަރީ އޮމާންކޮށް ރާވައި ކުރިއަށް ގެންދިޔުމުގައި ހަރަކާތްތެރިވި ޕާޓީގެ ހުރިހާ ބޭފުޅުންނަށާއި ވޯޓުގައި ބައިވެރިވެވަޑައިގެންނެވި ހުރިހާ މެންބަރުންނަށް ޝުކުރުއަދާކުރައްވާފައެވެ.

އިއްޔެ އެމްޑީޕީން ބާއްވާފައި ވަނީ ކުރިޔަށް އޮތް ރައްޔިތުންގެ މަޖިލީހަށް އެޕާޓީގެ ޓިކެޓް ދޭނެ ބޭފުޅުން ކަނޑައެޅުމުގެ ޕްރައިމަރީއެވެ. 40 ދާއިރާއެއްގެ ޕްރައިމަރީ އިއްޔެ ބޭއްވި އިރު، އެޕްރައިމަރީގައި 149 ކެނޑިޑޭޓުން ވަނީ ވާދަކުރައްވާފައެވެ. އަދި މިއިންތިޚާބުގައި 25324 މީހުންނަށް ވޯޓު ލުމުގެ ޙައްޤު ލިބުނު އިރު، ވޯޓުލާފައި ވަނީ 16048 މީހުންނެވެ.