ވިހި ވަނަ މަޖިލީހަށް މެމްބަރުން އިންތިހާބު ކުރުމަށް މިއަންނަ މާޗު މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ތަމްސީލުކުރާނެ ކެނޑިޑޭޓުން ހޮވުމަށް، އެ ޕާޓީއިން މިއަދު ބޭއްވި ޕްރައިމަރީގައި އައްޑޫ މީދޫ ދާއިރާގެ މެމްބަރު، ރޮޒައިނާ އާދަމަށް ނާކާމިޔާބީއާ ކުރިމަތިލާން ޖެހިއްޖެއެވެ.

އިތުރު ދެ ކެނޑިޑޭޓުންނާއެކު ރޮޒައިނާ ވާދަކުރެއްވީ ފޭދޫ އުތުރު ދާއިރާގެ އެމްޑީޕީގެ ޓިކެޓަށެވެ. ނަމަވެސް، މާލެއާއި އައްޑޫގައި ބެހެއްޓި ފޮށިންވެސް ރޮޒައިނާއަށް ކުރި ލިބިފައެއް ނުވެއެވެ. މި އިންތިހާބު ކާމިޔާބުކޮށް، މުޅިން އަލަށް އުފެއްދި ފޭދޫ އުތުރު ދާއިރާގެ ޓިކެޓު ކަށަވަރު ކުރެއްވީ އަހުމަދު ޝަރީފު (ޑުންގާ)އެވެ.

އައްޑޫއިން ފުރަތަމަ އަންހެން މެންބަރަކަށް ހޮވި ވަޑައިގެންނެވި ރޮޒައިނާ ވަނީ، އައްޑޫ މީދޫ ދާއިރާގެ ގޮނޑި ޖެހިޖެހިގެން ދެ ދައުރުގައި ކާމިޔާބު ކުރައްވާފައެވެ. އެއީ 2014 ވަނަ އަހަރާއި 2019 ވަނަ އަހަރުއެވެ. އައްޑޫ މީދޫ ދާއިރާގެ ގޮނޑީގެ އިތުރުން ރޮޒައިނާ ވަނީ ތުލުސްދު ދާއިރާގެ މެންބަރުކަންވެސް އަދާކޮށްފައެވެ.

ވިހިވަނަ ރައްޔިތުންގެ މަޖިލިސް އިންތިހާބުގައި މަޖިލީހުގެ 93 ދާއިރާއެއްގެ ތެރެއިން އެމްޑީޕީން ޕްރައިމަރީ ބާއްވަނީ 40 ދާއިރާއެއްގެއެވެ. އެ ދާއިރާތަކަށް 149 ކެންޑިޑޭޓުން ވާދަކުރައްވާފައިވެއެވެ.