ޕްރޮސެކިއުޓަރ ޙުސައިން ޝަމީމަށް އިއްޔެ މޫނު ނިވާކޮށްގެން ތިބި ބަޔަކު މަރުތޭލަކުން ހަމަލާދިން އިރު އެމަނިކުފާނަށް ސެކިއުރިޓީ ދިނުން އޮތީ ހުއްޓާލާފައި ކަމުގައި ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްެޖެއެވެ.

ޕީޖީ ޝަމީމަށް ހަމަލާދިން މައްސަލައިގައި ދެމީހަކު ހައްޔަރުކޮށްފައިވާކަން މީޑިއާއަށް ހާމަކުރުމަށް އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި، ސީޕީ ޝުޖާއު ވިދާޅުވީ، ކޯޓުގައި ހިނގަމުންދިޔަ މައްސަލައަކާއި ގުޅިގެން ޕްރޮސެކިއުޓަރ ޖެނެރަލް ޙުސައިން ޝަމީމަށް ކުރިން ސެކިއުރިޓީ ދެމުން ދިޔަ ކަމަށާއި އެހެން ނަމަވެސް ނުރައްކަލެއް ނެތުމުން ފަހުން އޮތީ ސެކިއުރިޓީ ދިނުން މެދުކަނޑާލާފައި ކަމަށެވެ.

އިއްޔެ ނޫރު މިސްކިތް ކައިރިން ޕީޖީ ޝަމީމަށް މޫނު ނިވާކޮށްގެން ގޮސް ބަޔަކު ހަމަލާދިން އިރު، އެފަދަ ހަމަލާއެއް ދޭން އުޅޭ ކަމުގެ އިންޓަލިޖެންސް މައުލޫމާތެއް ފުލުހުންނަށް ލިބިފައި ނެތްކަންވެސް ސީޕީ ފާހަގަކުރެއްވިއެވެ. ސީޕީ ޝުޖާއު ވިދާޅުވީ، ދައުލަތުގެ އިސްވެރިންނަށް ނުރައްކާތައް އޮތް މިންވަރު ބަލައި އަޅުއްވަންޖެހޭ ފިޔަވަޅުތައް އަޅުއްވަމުން ގެންދަވާ ކަމަށާއި، ޕީޖީ ޝަމީމަށްވެސް މިހާރު ސެކިއުރިޓީ ދޭން ފަށާފައިވާކަމަށެވެ.

ޕްރޮސެކިއުޓަރ ޖެނެރަލް ޙުސައިން ޝަމީމަކީ، އެމަޤާމުގައި ހުންނެވި ނަމަވެސް އާއްމުންގެ ތެރޭގައި ވަރަށް އާދައިގެ ގޮތެއްގައި ދިރިއުޅުންވަމުން ގެންދެވި ސާދާ ބޭފުޅެކެވެ. ފެތުމަށް ޓްރެކަށް ވަޑައިގެންނެވުމާއި، ކަސްރަތަށް މާލޭގެ މަގުމައްޗަށް ނުކުމެވަޑައިގެން އާއްމުންގެ ތެރޭގައި އާދައިގެ އެހެން މީހުންނެކޭ އެއްގޮތަށް އެމަނިކުފާނު ދިރިއުޅުއްވަމުން ގެންދެވިއެވެ.