ބޭރު ޤައުމެއްގެ ސިފައިން ރާއްޖޭގެ މަސްދޯންޏެއް ކަމަށްވާ، އަސުރުމާ -3 އަށް އެރި އިރު އެދޯނި އޮތީ ރާއްޖޭގެ ޚާއްޞަ ޢިޤުތިިޞާދީ ސަރަހައްދުގައި ކަމަށް ކަށަވަރުވާ ކަމުގައި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް, އަޙްމަދު ޝިޔާމް ވިދާޅުވެއްޖެއެވެ.

ބޭރުގެ ސިފައިންގެ މަނަވަރެއް ރާއްޖޭގެ ސަރަހައްދުގެ ތެރެއަށް ވަދެ ރާއްޖޭގެ މަސްދޯންޏެއް ކަމަށްވާ، އަސުރުމާ -3 އަރައި އެދޯނީގެ ފަޅުވެރިންނާއި ސުވާލުކޮށްފައިވާކަން، ބޮޑުކަންނެލި މަސްވެރިންގެ ޔޫނިއަންއިން ސަރުކާރުގެ ސަމާލުކަމަށް ގެނައުމާއި ގުޅިގެން އެކަމާއި ގުޅޭ ގޮތުން މިނިސްޓަރ ޝިޔާމް ކުރެއްވި ޕޯސްޓްގައި ވިދާޅުވީ، އަސުރުމާ-3 ދޯނި ހއ. ތުރާކުނުގެ އިރުމަތިން 72 މޭލު ބޭރުގައި ބޮޑުކަންނެލީގެ މަސްވެރިކަން ކުރުމުގައި ހަރަކާތްތެރިވަމުން ދަނިކޮށް ބޭރު ޤައުމެއްގެ އަސްކަރީ އުޅަނދަކުން އަސުރުމާ 3 އަށް އަރައި ފަޅުވެރިންނާ ސުވާލުކޮށްފައިވާކަމީ ނުހަނު ކަންބޮޑުވާ ކަމެއް ކަމަށެވެ. އަދި މިއުޅަނދު ހަރަކާތްތެރި ވަމުންދިޔައީ ދިވެހިރާއްޖޭގެ ކަނޑުގެ ސަރަހައްދުގައިކަން މިނިސްޓްރީގެ ވެސަލް މޮނީޓަރިންގ ސިސްޓަމްއިން ކަށަވަރުވާކަމަށާއި،  މި ހާދިސާއާ ގުޅިގެން ކޯސްޑްގާޑާއި އުޅަނދުގެ ވެރިފަރާތާއެކު ގާތުން މަސައްކަތް ކުރަމުން ދާކަމުގައިވެސް ފިޝަރީޒް މިނިސްޓަރ ވިދާޅުވިއެވެ.

ރާއްޖޭގެ ކަނޑުގެ ސަރަހައްދަށް ވަދެފައި ވަނީ އިންޑިއާ ނޭވީގެ މަނަވަރުތަކެއް ކަމަށް ދޯނީގައި ތިބި މީހުންނާއި ހަވާލާދީ، ވެރިފަރާތުން ރިޕޯޓްކޮށްފައިވެއެވެ.

މިހާދިސާ އާއި ގުޅިގެން އެންމެފަހުން އެމްއެންޑީއެފުން ބުނީ ދޯނި އޮތް ސަރަޙައްދަށް އެމްއެންޑީއެފްގެ އުޅަނދެއް ދަތުރުކުރަމުންދާ ކަމަށެވެ.

މީގެ ކުރިން ކަންނެލި މަސްވެރިކަން ކުރާ އުޅަނދުފަހަރަށް، ރާއްޖޭގެ އީއީޒެޑުން ބޭރަށް ނުކުމެވިގެން އިންޑިއާ އަސްކަރީ މަނަވަރުތަކުން ދިވެހި މަސްދޯނި ފަހަރަށް އަރައި ސުވާލުކޮށްފައިވެއެވެ. އެހެން ނަމަވެސް މިއަދުގެ ހާދިސާގައި އިންޑިއާ ސިފައިން އަސުރުމާ-3 ދޯންޏަށް އެރީ އެދޯނި ރާއްޖޭގެ ކަނޑުގެ ސަރަހައްދުގެ ތެރޭގައި އޮއްވައި އިންޑިއާނޭވީގެ މަނަވަރު ރާއްޖޭގެ ކަނޑުގެ ސަރަހައްދަށް ވަދެގެން ކަމުގައި ރިޕޯޓްތައް ވަނީ ބުނެފައެވެ.