ޕްރޮސެކިއުޓަރ ޖެނެރަލް ޙުސައިން ޝަމީމަށް ދެމީހަކު މަގުމަތިން ހަމާލާދީ ޒަޚަމްކޮށްލުމާއި ގުޅިގެން ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް އެކަން ކުއްވެރިކުރައްވައިފިއެވެ.

ރައީސް ޞާލިޙް އެކްސްގައި ކުރެއްވި ޕޯސްޓެއްގައި އެހަމަލާ ކުއްވެރި ކުރައްވައި ވިދާޅުވީ، ޑިމޮކްރެޓިކް މުޖުތަމަޢެއްގައި ސިޔާސީ މަޤްޞަދުގައި ހިންގާ ހަމަނުޖެހުންތަކުގެ އެއްވެސް ޖާގައެއް ނޯންނާނެ ކަމަށާއި، އެކަން ކުރި ފަރާތްތައް އިންސާފުގެ ކުރިމައްޗަށް ގެނައުމުގައި އަވަސް ފިޔަވަޅުތަކެއް އެޅުމަށް ސަރުކާރަށް ގޮވާލައްވާ ކަމަށެވެ.

މިއަދު ހެނދުނު މާލޭ ނޫރު މިސްކިތް ކައިރިން ޕީޖީ ޝަމީމަށް ހަމަލާދީފައި ވަނީ މަރުތޭލަކުންނެވެ. ހަމަލާދިން މީހުން ހުއްޓުވީވެސް ޕީޖީ ޝަމީމެވެ. މިހަމަލާގައި އެމަނިކުފާނުގެ ވާތްޕުޅުގެ ކަށިގަނޑަށް އަނިޔާވެފައިވާ ކަމަށާއި، ހާލު ރަނގަޅު ކަމަށް ޕީޖީ ޝަމީމާއި ގާތްގުޅުމެއް އޮންނަ ބޭފުޅުން ވަނީ ސޯޝަލްމީޑިއާގައި ވިދާޅުވެފައެވެ.