މަސްކިރުވުމަށް ފަހު، މިހާ ގިނަ ދުވަހު މަސްވެރިންނަށް ފައިސާ ނުލިބި ދިޔަ ޒަމާނެއް، މަސްވެރިން ނުދެކޭކަމުގައި މަސްވެރިން ބުނާކަމުގައި، އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.

17 ނޮވެމްބަރު 2023ގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށްފަހުގައި ސަރުކާރުގެ މަސްކުންފުނި މިފްކޯއަށް ގެންނެވި ބަދަލުތަކަށް ފަހުގައިވެސް އެކުންފުނިން މަސްވެރިންނަށް ދޭންޖެހޭ ފައިސާ ވަނީ ނުދެވިފައެވެ. މަސްވެރިން ކިރުވާފައިވާ މަހަށް މަސްވެރިންނާއި އޮޑިވެރިންނަށް ހަމަޔަށް ފައިސާ ނުލިބުމުގެ ދަތިތައް މަސްވެރި އަދި އޮޑިވެރި އާއިލާތަކުން ތަޙައްމަލުކުރަމުންދާއިރު، އެކަމުގެ ޝަކުވާތައް އިވެމުންދާކަމުގައި އައްޑޫ ސިޓީގެ މޭޔަރު ޢަލީ ނިޒާރު ވިދާޅުވިއެވެ.

ނިޒާރު ވިދާޅުވީ، ކުރިއަށް އޮތީ ރަމަޟާން މަހަށް ވެފައި މަސްވެރިންނާއި އެބޭފުޅުންގެ އާއިލާތައް ބިކަ ނުވާނެހެން ސަރުކާރުން އަވަސް ފިޔަވަޅެއް މިކަމުގައި އަޅުއްވައި ދެއްވުން އެދިވަޑައިގަންނަވާ ކަމަށެވެ.

މަސްވެރިންގެ ތެރެއިން ބައެއް އޮޑިފަހަރުން މިފްކޯއަށް ކިރުވާފައިވާ މަހަށް ފައިސާ ނުލިބި ދެ ހަފްތާއަށްވުރެ ގިނަ ދުވަސްވީ ދޯނިތައްވެސް އެބަހުއްޓެވެ. މަސްވެރިންނަށް ނުދީ ހުރި ފައިސާގެ ތެރެއިން 100 މިލިޔަން ރުފިޔާ، ޖެނުއަރީ 10 ވަނަ ދުވަހު ދޫކުރާނެކަން ސަރުކާރުން ޢިއުލާނު ކުރިއެވެ. އެހެން ނަމަވެސް ފައިސާ ދޫކުރެވުނު ގޮތުގެ ތަފްޞީލެއް ސަރުކާރުން ހާމައެއް ނުކުރެއެވެ.