ޢެމްޑީޕީ ސަރުކާރުގެ ހޯމް މިނިސްޓަރުގެ މަޤާމް ފުރުއްވި އަދާލަތު ޕާޓީގެ ރައީސް އައްޝައިޚް ޢިމްރާން ޢަބުދުﷲ، ރައްޔިތުންގެ މަޖިލީހުގެ އިންތިޚާބުގައި ވާދަކުރެއްވުމަށް ނިންމަވައި އެކަން ޢިއުލާނު ކުރައްވައިފިއެވެ.

ކުރީގެ މިނިސްޓަރ ޢިމްރާން ރައްޔިތުންގެ މަޖިލީހުގައި ވާދަކުރައްވާނެކަން ޢަދާލަތުޕާޓީން ވަނީ ޢިއުލާނުކޮށްފައެވެ. އެޕާޓީން ބުނީ މަޖިލީހަށް އެޕާޓީގެ ރައީސް އިމްރާން ވާދަކުރައްވާނީ ރައްޔިތުންގެ މަޖިލީހުގެ މަކުނުދޫ ދާއިރާއަށެވެ. އެދާއިރާއަކީ މިހާތަނަށް ރައްޔިތުންގެ މަޖިލީހުގައި އަދާލަތުޕާޓީއަށް ގޮނޑިއެއް ކާމިޔާބު ކުރެވުނު ހަމައެކަނި ދާއިރާއެވެ. 18 ވަނަ ރައްޔިތުންގެ މަޖިލީހުގައި އެގޮނޑި ފުރުއްވީ އަދާލަތު ޕާޓީގެ މެމްބަރު އަނާރާ ނަޢީމެވެ.

މީގެ އިތުރުން އަދާލަތު ޕާޓީން ވާދަކުރާނެކަން ޢިއުލާނުކޮށްފައިވާ ދާއިރާތަކުގެ ތެރޭގައި ރައްޔިތުންގެ މަޖިލީހުގެ ވައިކަރަދޫ ދާއިރާ އާއި ރައްޔިތުންގެ މަޖިލީހުގެ ފުނަދޫ ދާއިރާ އާއި ރައްޔިތުންގެ މަޖިލީހުގެ އިނގުރައިދޫ ދާއިރާ ހިމެނެއެވެ.

ރައްޔިތުންގެ މަޖިލީހަށް އަދާލަތު ޕާޓީގެ ޓިކެޓްގައި ވާދަކުރައްވާ ބޭފުޅުންނަކީ:

1- ޙުސައި ސަޤީފް - ވައިކަރަދޫ ދާއިރާ.

2- އިސްމާޢީލް ޙަމީދު - ފުނަދޫ ދާއިރާ

3- އިސްމާޢީލް ޢަލީ - އިނގުރައިދޫ ދާއިރާ

ރައްޔިތުންގެ މަޖިލީހުގެ އިންތިޚާބާއި ގުޅޭ ގޮތުން އެމްޑީޕީއާ އަދާލަތުޕާޓީން މަޝްވަރާކޮށްފައިވެއެވެ. އެހެން ނަމަވެސް މަޖިލީހުގެ އިންތިޚާބުގައި ދެޕާޓީ ގުޅިގެން ވާދަކުރުމާއި ގުޅޭ ގޮތުން އެ ދެޕާޓީންވެސް އެއްވެސް އެއްޗެއް ބުނެފައެއް ނުވެއެވެ.

ރައްޔިތުންގެ މަޖިލީހުގައި ޖުމުލަ 96 ދާއިރާއެއް އޮތް އިރު އެމްޑީޕީންވަނީ މަޖިލީހުގެ ހުރިހާ ދާއިރާއަކަށް އެޕާޓީން ކެންޑިޑޭޓުން ނެރޭނެ ކަމަށް ބުނެ ފައެވެ.