ދައުރުން ބޭރުގައި ބާއްވާ ރައްޔިތުންގެ މަޖިލީހުގެ ޖަލްސާ މިޖެނުއަރީ މަހުގެ 28ވާ އާދީއްތަ ދުވަހު ބޭއްވުމަށް ނިންމަވައި، މަޖިލީހުގެ ރައީސް މިރޭ މެމްބަރުންނަށް ނޯޓިސް ފޮނުއްވައިފިއެވެ.

ދައުރުން ބޭރުގައި މަޖިލީހުގެ ޖަލްސާއެއް ބާއްވައި ދިނުމަށް އެދި ރައްޔިތުންގެ މަޖިލީހަށް ހުށައަޅާފައި ވަނީ އެމްޑީޕީއާ ދަ ޑިމޮކްރެޓްސްއަށް ނިސްބަތްވާ 38 މެމްބަރަކު ސޮއިކުރައްވައެވެ.

ދައުރުން ބޭރުން ބާއްވާ ޖަލްސާގައި ކުރާނެ ކަންކަމުގެ ތެރޭގައި، އިންތިޚާބުތަކާއި ބެހޭ އާއްމު ޤާނޫނަށް ހުށައަޅާ އިންތިޚާބުތައް ރޯދަމަހުގެ ތެރޭގައި ނުބޭއްވުމަށް ކަނޑައަޅައި ޤާނޫނު އިސްލާޙްކުރުމުގެ ބިލާއި، ރައްޔިތުންގެ މަޖިލީހުގެ އަދަދު ކަނޑައެޅުމުގެ ބިލާއި، ވަޒީރުންނަށް ރުހުން ދިނުން މަސައްކަތްވެސް ހިމެނޭނެކަމަށް އެމްޑީޕީއާ ދަ ޑިމްކޮސްރެޓްސްއިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ބުނެފައެވެ.

މިގޮތުން، ރައްޔިތުންގެ މަޖިލީހުގެ އިންތިޚާބު އިލެކްޝަންސް ކޮމިޝަނުން މިހާރު އިއުލާނުކޮށްފައިވާއިރު، އެމްޑީޕީއާ ދަ ޑިމޮކްރެޓްސްއިންވެސް ބޭނުން ވަނީ، ރޯދައިގެ ފަހުން އިންތިޚާބު ބޭއްވުމަށެވެ. އެހެންވެ، ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް ހުށައަޅާ އެންމެ މުހިއްމު ކަމަކީ، އިންތިޚާބު ލަސްކުރުމެވެ. އިންތިޚާބުތަކާއި ބެހޭ އާއްމު ޤާނޫނަށް އިސްލާޙް ގެނައުމަށް ރައްުޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށައަޅުވާ ބިލްގައި ބަޔާންކޮށްފައި ވަނީ ރަމަޟާން މަސް ނިމިގެން 10 ދުވަސް ފަހުން އިންތިޚާބު ބޭއްވުމަށެވެ.