ރައްޔިތުންގެ މަޖިލީހުގެ މެމްބަރުންގެ އަދަދާއި، ސިޔާސީ މަޤާމުތަކުގެ އަދަދު ލިމިޓްކުރުމަށް ޤާނޫނުތަކަށް އިސްލާހްތައް ހުށައަޅަން ނިންމައި އެކަމަށް އެމްޑީޕީއާ ޑިމޮކްރެޓްސް ގުޅިގެން މަސައްކަތް ކުރަން ފަށާފައިވާކަމުގައި އެދެޕާޓީން ބުނެފިއެވެ.

އެމްޑީޕީއާ ދަ ޑިމޮކްރެޓްސްގެ އިސްބޭފުޅުން ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަދި މަޖިލީހުގެ ނައިބު ރައީސް އަޙްމަދު ސަލީމް ވިދާޅުވީ، ސަރުކާރުގެ ހިންގުމުގެ ޚަރަދުތައް ކުޑަކުރަން ޖެހޭ ކަމަށާއި، އުއްމީދު ކުރެއްވީ މިސަރުކާރުން އެފަދަ މަސައްކަތްތަކެއް ކުރައްވާނެކަން ކަމަށެވެ. 

ސަލީމް ވިދާޅުވީ، ޖުމުލަ ގޮތެއްގައި ރާއްޖޭގެ ހިންގުމުގެ ޚަރަދުކުޑަކޮށްގެން ނޫނީ، ރާއްޖޭގެ އިޤުތިޞާދު ދެން ހަމަ މަގަށް އެޅިދާނެ ކަމަށް ޤަބޫލު ނުކުރެއްވޭ ކަމަށެވެ. ދެޕާޓީން ގުޅިގެން މަސައްކަތް ކުރަން ނިންމީ އެހެންވެ ކަމުގައި ސަލީމް ވިދާޅުވިއެވެ.

ރައްޔިތުންގެ މަޖިލީހުގެ މެމްބަރުންގެ އަދަދު ވަކިމިންވަރަކަށް ލިމިޓް ކުރުމަކީ، އެމްޑީޕީއާ ދަ ޑިމޮކްރެޓްސްއިންވެސް ރިޔާސީ އިންތިޚާބުގައި އެދެޕާޓީގެ މެނިފެސްޓޯގައި ހިމެނި ކަމެކެވެ. 

ރައްޔިތުންގެ މަޖިލީހަށް މިދައުރުގައި ހޮވި މެމްބަރުންގެ އަދަދަކީ 87 އެވެ. ކުރިޔަށް އޮތް ރައްޔިތުންގެ މަޖިލީހަށް އިތުރުވި އިދާރީ 6 ދާއުރާ އާއެކު 20 ވަނަ ރައްޔިތުންގެ މަޖިލީހަށް 96 މެމްބަރުން އިންތިޚާބު ކުރާނެއެވެ.