ރައްޔިތުންގެ މަޖިލީހުގެ ޖަލްސާއެއް ދައުރުން ބޭރުގައި ބޭއްވުމަށް ހުށައަޅައިފިއެވެ.

އެމްޑީޕީއާ ދަ ޑިމޮކްރެޓްސް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި، އެމްޑީޕީއާ ދަޑިމޮކްރެޓްސްއިންވެސް ވަނީ، ދައުރުން ބޭރުގައި ޖަލްސާއެއް ބޭއްވުމަށް ހުށައަޅާފައިވާ ކަން ހާމަކޮށްފައެވެ. ދަ ޑިމޮކްރެޓްސްގެ ޕާލަމެންޓްރީ ގުރޫޕުގެ މެމްބަރު ޢަލީ އާޒިމް ވިދާޅުވީ، މަޖިލީހުގެ ރައީސަށް ދައުރުން ބޭރުން ޖަލްސާއެއް ބާއްވައި ދިނުމަށް އެދި ހުށައަޅާފައިވާ ކަމަށާއި، އެޖަލްސާ އަންނަ ހަފްތާގައި ބޭއްވޭނެ ކަމަށް އުއްމީދު ކުރައްވާ ކަމަށެވެ.

އާޒިމް ވިދާޅުވީ މަޖިލީހުގެ ދައުރުން ބޭރުގައި ޖަލްސާއެއް ބާއްވައި ދިނުމަށް ހުށައަޅައިފިނަމަ ގިނަވެގެން 14 ދުވަހުގެ ތެރޭގައި އެޖަލްސާ ބާއްވައިދޭން ޖެހޭނެ ކަމަށެވެ. އަދި އުއްމީދު ކުރަނީ އަންނަ ފެބުރުއަރީ މަހުގެ 5 ވަނަ ދުވަހު، ރައްޔިތުންގެ މަޖިލީހުގެ އައު ދައުރު ފެށުމުގެ ކުރިން ޖަލްސާ ބޭއްވޭނެ ކަމަށް ކަމަށާއި، ދައުރުން ބޭރުން ބާއްވާ ޖަލްސާއަށް، އިންތިޚާބުތަކާއި ބެހޭ އާއްމު ޤާނޫނަށް ހުށައަޅާ އިންތިޚާބުތައް ރޯދަމަހުގެ ތެރޭގައި ނުބޭއްވުމަށް ކަނޑައަޅައި ޤާނޫނު އިސްލާޙްކުރުމުގެ ބިލާއި، ރައްޔިތުންގެ މަޖިލީހުގެ އަދަދު ކަނޑައެޅުމުގެ ބިލާއި، ވަޒީރުންނަށް ރުހުން ދިނުން ހިމެނޭނެކަމަށް ވެސް ދެޕާޓިން ވަނީ ބުނެފައެވެ.

ރައްޔިތުންގެ މަޖިލީހުގެ އިންތިޚާބު އިލެކްޝަންސް ކޮމިޝަނުން މިހާރު އިއުލާނުކޮށްފައިވާއިރު، އެމްޑީޕީއާ ދަ ޑިމޮކްރެޓްސްއިންވެސް ބޭނުން ވަނީ، ރޯދައިގެ ފަހުން އިންތިޚާބު ބޭއްވުމަށެވެ. އެހެންވެ، ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް ހުށައަޅާ އެންމެ މުހިއްމު ކަމަކީ، އިންތިޚާބު ލަސްކުރުމެވެ.

ދައުރުން ބޭރުގައި މަޖިލީހުގެ ޖަލްސާއެއް ބާއްވައިދިނުމަށް އެދި ހުށައަޅާފައި ވަނީ، 38 މެމްބަރުންގެ ސޮޔާއިއެކުގައެވެ. އޭގެ ތެރޭގައި އެމްޑީޕީގެ މެމްބަރުންނާއި ދަ ޑިމޮކްރެޓްސްގެ މެމްބަރުންވެސް ހިމެނެއެވެ.