އެމްޑީޕީއާ ދަ ޑިމޮކްރެޓްސްއިން އެއްބަސްވީ މަޖިލީހަށް ހުށައަޅާ ބިލްތަކުގެ މަސައްކަތް ގުޅިގެން ކުރުމަށް ކަމަށާއި، ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ދެޕާޓިން ވާދަކުރާނީ ވަކިން ކަމަށް، އެމްޑީޕީއާ ދަ ޑިމޮކްރެޓްސްއިން ބުނެފިއެވެ.

ދެޕާޓީގެ އިސްބޭފުޅުން ބައިވެރިވެވަޑައިގެން މިއަދު ހަވީރު، ޗަމްޕާ ސެންޓްރަލް ހޮޓެލްގައި ބޭއްވި ނޫސްވެރިންގެ ބައްދަަލުވުމުގައި، އެމްޑީޕީގެ ޗެއާ ޕާސަން ފައްޔާޒް އިސްމާއީލް ވިދާޅުވީ، މަޖިޅީހަށް ހުށައަޅަން ތައްޔާރުވަމުންދާ ބިލްތަކުގެ މަސައްކަތްތަކުގައި ދެޕާޓީން ގުޅިގެން މަސައްކަތް ކުރުމަށް މަޝްވަރާތައް ކުރެވިފައިވާ ކަމަށެވެ. އަދި ރައްޔިތުންގެ މަޖިލީހުގެ އިންތިޚާބުގައި ދެޕާޓީން ގުޅިގެން މަސައްކަތް ކުރުމަށް މަޝްވަރާއެއް ނުކުރާ ކަމަށާއި، އެމްޑީޕީން މަޖިލީހުގެ ހުރިހާ ދާއިރާތަކަށްވެސް ވާދަކުރާނެ ކަމުގައި ފައްޔާޒް ވިދާޅުވިއެވެ.

ފައްޔާޒު ވިދާޅުވީ، ޑިމޮކްރެޓްސްއާ އެމްޑީޕީންވެސް ސަރުކާރާއި މެދު ކަންބޮޑުވާ ކަންތައްތަކެއް އެބަހުރި ކަމަށާއި އެހެން، މަސައްކަތް ކުރަމުން ދަނީ ސަރުކާރު ޖަވާބުު ދާރީ ކުރުވުމުގައި ދެޕާޓީ އެކުގައި މަޖިލިސް ތެރޭގައި މަސައްކަތް ކުރެވޭނެ ގޮތެއް ހޯދުމަށް ކަމަށެވެ. އެގޮތުން ޤާނޫނު އަސާސީއަށް ހުށައަޅާ އިސްލާޙްތަކާއި އާއްމު އިންތިޚާބާއި ބެހޭ ޤާނޫނަށް އިސްލާޙް ގެނައުމުގައި ދެޕާޓިން ގުޅިގެން މަސައްކަތް ކުރާނެ ކަމުގައި ފައްޔާޒު ވިދާޅުވިއެވެ.

ރައްޔިތުންގެ މަޖިލީހުގައި އޮތް ސުޕަރމެޖޯރިޓީ އެމްޑިޕީއަށް ގެއްލިގެން ދިޔައީ، ރައީސް ނަޝީދަށް ވަފާތެރި ބޭފުޅުން އުފެއްދެވި ދަ ޑިމޮކްރެޓްސްއާ އެމްޑީޕީގެ 13 މެމްބަރަކު ގުޅިވަޑައިގެންނެވުމުންނެވެ. އަދި އެމްޑީޕީއަށް ރިޔާސީ އިންތިޚާބު ގެއްލިގެން ދިޔުމުގެ މައިގަނޑު ސަބަބަކަށްވެސް އެކަން ވެގެންދިޔައެވެ. އޭގެ ފަހުން ހުސްވި ޑިސެމްބަރު މަހު އެމްޑީޕީގެ އިތުރު 13 މަޖިލިސް މެމްބަރަކު ޕާޓީ ދޫކުރައްވައި ވެރިކަން ކުރާ ޕާޓީ ޕީއެންސީއާ ގުޅިވަޑައިގަތެވެ.

ދަޑިމޮކްރެޓްސްއާ އެމްޑީޕީން މަޖިލީހުގެ ތެރޭގައި ގުޅިގެން މަސައްކަތް ކުރާ ނަމަ އެދެޕާޓީއަށް މަޖިލީހުގެ ސާފު މެޖޯރިޓީ ލިބެއެވެ. ދެޕާޓީގެ މަޖިލިސް މެމްބަރުންގެ ގޮތުގައި މިވަގުތު 55 މެމްބަރުން އެބަ ތިއްބެވިއެވެ.