ކުރިޔަށް އޮތް މަޖިލިސް އިންތިޚާބުގައި ދަ ޑިމޮކްރެޓްސްއިން އެމްޑީޕީއާ ގުޅިގެން މަސައްކަތް ކުރަންތައްޔާރުވެއްޖެއެވެ.

އެމްޑީޕީއާ ދަ ޑިމޮކްރެޓްސްގެ އިސްބޭފުޅުން މިހަފްތާގައި ވަނީ ބައްދަލުކޮށްފައެވެ. މިގޮތުން ދަ ޑިމޮކްރެޓްސްގައި އެންމެ އިސްކޮށް ތިއްބެވި ބޭފުޅުންނާއި އެމްޑީޕީގެ އިސްބޭފުޅުން ބޭއްވެވި ބައްދަލުކުރެއްވުމާއި ގުޅޭ މައުލޫމާތެއް ދެޕާޓީން މިހާތަނަސް ހާމަކޮށްފައެއް ނުވެއެވެ. އެހެންނަމަވެސް އެދެޕާޓީގެ ފަރާތުން ބާއްވާ ނޫސްވެރިންގެ ބައްދަލުވުމެއް މިއަދު އޮންނާނެކަން މިހާރު ވަނީ އިޢުލާނުކޮށްފައެވެ.

މިނޫސް ކޮންފަރެންސް އޮންނާނީ ޗަމްޕާ ސެންޓްރަލް ހޮޓެލްގައި މިއަދުގެ 4:00ގައި ކަމަށް އެމްޑީޕީން ވަނީ ބުނެފައެވެ.

ދަ ޑިމޮކްރެޓްސްއަކީ، އެމްޑީޕީގައި ތިއްބެވި މަޖިލިސް މެމްބަރުންތަކެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ދެކޮޅުވެ އެމްޑީޕީގެ ތެރެއިން ވަކި ފެކްޝަނެއް ހަދައިގެން އުފެއްދި ޕާޓީއެކެވެ. އެމްޑީޕީ ރޫޅާލުމަކީ، ދަޑިމޮކްރެޓްސްގެ މައިގަނޑު މަގުޞަދުކަމުަގައި އެޕާޓީގެ އެންމެ އިސްފަރާތްތަކުން އައީ ބުނަމުންނެވެ. އަދި 2023 ވަނަ އަހަރުގެ ރިޔާސީ އިންތިޚާބުގެ ކެމްޕޭނުގައި އިދިކޮޅު ފަރާތްތަކުން އެމްޑީޕީގެ ކެންޑިޑޭޓަށް ނުކުރާ މިންވަރަސް ދަ ޑިމޮކްރެޓްސްއިން ވަނީ، އެމްޑީޕީއަށް އެންޓި ކެމްޕޭންވެސް ކޮށްފައެވެ. 

ރިޔާސީ އިންތިޚާބާއި، މާލޭ ސިޓީގެ މޭޔަރު ހޮވުމުގެ އިންތިޚާބުގައިވެސް ދަ ޑިމޮކްރެޓްސްއަށް ކުރިމަތިވީ ބޮޑު ނާކާމިޔާބީއަކާއެވެ.