މިސަރުކާރުގެ ބޯހިޔާވަހިކަމުގެ އެންމެ ބޮޑު މަޝްރޫޢު ހިންގުމަށް ރާވާފައިވާ، ފުށިދިއްގަރުފަޅުގައި ތަރައްޤީކުރާ، ރަސްމާލެ އާއި މާލެ ސިޓީ އަންޑަރ ވޯޓަރ ޓަނަލަކުން ގުޅާލައްވާނެ ކަމުގައި ރައީސުލްޖުމްހޫރިއްުޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، މާލޭ ސިޓީ ކައުންސިލަށް ހޮވިވަޑައިގެންނެވި މެމްބަރުން ހުވާކުރުމަށާއި މާލޭ ސިޓީ ކައުންސިލްގެ މޭޔަރު ހުވާކުރެއްވުމަށް މިރޭ ދަރުބާރުގޭގައި ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގައި އޮތް އެންމެ ބޮޑު މައްސަލައަކީ، ޚާއްޞަކޮށް މާލެ ސަރަހައްދުގައި އޮތް އެންމެ ބޮޑު މައްސަލައަކީ، ބޯހިޔާވަހިކަމުގެ މައްސަލަކަން ފާހަގަ ކުރައްވައި، މިދައުރު ނިމޭއިރު ބޯހިޔާވަހިކަމުގެ މުޅި މައްސަލައަށް ހައްލު ހޯއްދަވައި ދެއްވާނެ ކަމުގައި ވިދާޅުވާ ވިދާޅުވުން ތަކުރާރު ކުރެއްވިއެވެ. އެމަނިކުފާނު ވިދާޅުވީ ގުޅިފަޅާއި، ގިރާވަރުފަޅު އަދި އުތުރު ތިލަފަޅާއި ހުޅުމާލެއިން ބޯހިޔާވަހި ކަމުގެ މުޅި މައްސަލައަށް ހައްލެއް ނުލިބޭ ކަމަށެވެ. އަދި ގްރޭޓާ މާލެ ކަނެކްޓިވިޓީ ބްރިޖުގެ މަސައްކަތްވެސް މިސަރުކާރުން ކުރިޔަށް ގެންގޮސް ނިންމާނެ ކަމުގައިވެސް އެމަނިކުފާނު ވިދާޅުުވިއެވެ.

ރައީސުލްޖުމްހޫރިއްޔާ ވިދާޅުވީ، ފޭރާން ހެޔޮނޫން ސިޔާސަތަކުން ހައްލުވާން ނެތް މައްސަލަ، ފޭރާން ހެޔޮ ސިޔާސަތަކުން، މާލޭގެ ގެދޮރުގެ މައްސަލަ ހައްލުކޮށްދެއްވާނެ ކަމަށެވެ. އަދި ރަސްމާލެ އާއި މާލެ ގުޅުވާލުމަށްޓަކައި ފަންނީ، އީޖާދީ މަސައްކަތްތަކެއް މިހާރު ވަނީ ފަށާފައިކަމުގައި އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އެޓަނަަލުގައި ދުއްވާ ރޭލުގެގައި ދަތުރު ކުރާއިރު ކަނޑުއަޑީގެ ރީތި މަންޒަރުތައްވެސް ފެންނަ ޓަނަލަކަށް އެޓަނަލު ވެގެން ދާނެ ކަމަށެވެ. އަދި އެމަސައްކަތް ކުރުމަށްޓަކައި އެކަމުގެ ޤާބިލްކަން ހުރި ކުންފުނިތަކާއި އެކު މިހާރު ވަނީ ފީސިބިލް މަސައްކަތް ފަށާފައި ކަމުގައިވެސް ރައީސުލް ޖުމްހޫރިއްޔާ ވިދާޅުވިއެވެ. އަދި އެއީ ފަތުރުވެރިކަމުގެ ބޮޑު މަޝްރޫޢަކަށްވެސް ވެގެން ދާނެ ކަމަށާއި އެއީ ރާއްޖެއަންނަ ޓޫރިސްޓުންގެ އަދަދުވެސް އިތުރުވެގެން ދާނެ ކަމެއް ކަމުގައި ރައީސުލް ޖުމްހޫރިއްޔާ ވިދާޅުވިއެވެ. އެމަނިކުފާނު އިތުރަށް ވިދާޅުވީ މިސަރުކާރުން ކުރާނީ ދެކޮޅު ޖެހޭ މަސައްކަތްކަމަށެވެ. 

އަދި މާލެ ސަރަހައްދުގައި މީހުން ދިރިއުޅޭނީ ލިންކް އެޅި ގުޅިފައިވާ ތަންތަނުގައި ކަމަށްވެސް އެމަނިކުފާނު ވިދާޅުވިއެވެ.