ކުރީގެ ނައިބު ރައީސް ފައި ޞަލް ނަސީމް ޖުމްހޫރީ ޕާޓީން ވަކިވެ ވަޑައިގެންފިއެވެ.

ޖުމްހޫރީ ޕާޓީން އެމަނިކުފާނު ވަކިވެވަޑައިގެންނެވިކަން، ރާއްޖޭގެ މީޑިއާތަކަށް އެމަނިކުފާނު ވަނީ ކަށަވަރުކޮށްދެއްވާފައެވެ.

ބައެއް އެހެން ފަރާތްތަކުން މައުލޫމާތު ލިބިފައިވާ ގޮތުގައި، ކުރީގެ ނައިބު ރައީސް އެމްޑީޕީއާ ގުޅިވަޑައިގަންނަވާނެ ކަމަށް ބެލެވެއެވެ. ވެރިކަމުގެ ދައުރު ނިމުމަށްފަހުގައި އެމްޑީޕީގެ ބައެއް ހަރަކާތްތަކުން އެމަނިކުފާނު ވަނީ ފެންނަން ފަށާފައެވެ.

މިގޮތުން މާލޭ ސިޓީގެ މޭޔަރުކަމަށް އެމްޑީޕީގެ ޓިކެެޓްގައި ވާދަކުރެއްވި އާދަމް އާޒިމްގެ ކެމްޕޭނުގައި އެމަނިކުފާނު ޢަމަލީ ގޮތުން ބައިވެރިވެވަޑައިގެންނެވިއެވެ. އަދި އާޒިމްއަށް މޭޔަރުކަމުގެ ގޮނޑި ކާމިޔާބުކުރެވުމާއި ގުޅިގެން ސަލްޓަންޕާކުގައި ބޭއްވި އެއްވުމުގައިވެސް ކުރީގެ ނައިބު ރައީސް ފައިޞަލް ނަސީމް ބައިވެރިވެވަޑައިގެންނެވިއެވެ.

ސިޔާސީ ދާއިރާގައި އެންމެ ފުރަތަމަ ފައިޞަލް ނަސީމް މަސައްކަތްޕުޅު ފެއްޓެވީވެސް އެމްޑީޕީއާ ގުޅިވަޑައިގެންނެވެ. ރާއްޖޭގައި ދައުރު ފުރުހަމަކުރެއްވި ފުރަތަމަ ނައިބު ރައީސަށް ފައިސަލް ވެވަޑައިގަންނަވާއިރު، ރައްޔިތުންގެ ޚާއްޞަ މަޖިލީހާއި، ރައްޔިތުންގެ މަޖިލީހުގެ މެމްބަރުކަންވެސް އެމަނިކުފާނު ވަނީ ކުރައްވާފައެވެ.