ދިވެހިރާއްޖެ އާއި އިންޑިއާ ދެމެދު އުފެދިފައިވާ މައްސަލަތައް ހައްލުކުރުމަށާއި އިންޑިއާ ސިފައިން ރާއްޖެއިން ބޭލުމާއި ގުޅޭ ގޮތުން އިންޑިއާ ސަރުކާރާއި ދިވެހި ސަރުކާރުން އުފައްދާފައިވާ ހައިލެވެލް ކޮމިޓީގެ ދެވަނަ މަޝްވަރާ ބައްދަލުވުން މިފެށޭ ފެބުރުއަރީ މަހުގެ ފުރަތަމަ ހަފްތާގައި ބޭއްވުމަށް ހަމަޖެހިފައިވާ ކަމުގައި ފޮރިން މިނިސްޓަރ މޫސާ ޒަމީރު ވިދާޅުވެއްޖެއެވެ.

ޔުގަންޑާގެ ކަމްޕާލާގައި މިހާރު ކުރިޔަށްދާ ނޮން-އެލައިންޑް މޫވްމަންޓް (ނާމް)ގެ 19 ވަނަ ސަމިޓުގައި ބައިވެރިވެވަޑައިގެންނެވުމަށް މިހާރު އެޤައުމަށް ވަޑައިގެން ހުންނެވި، ރާއްޖޭގެ ފޮރިން މިނިސްޓަރ މޫސާ ޒަމީރު، ނޫން.އެމްވީއަށް ވިދާޅުވީ، ހައިލެވެލް ކޮމިޓީގެ ދެވަނަ ބައްދަލުވުން މިހާރު ހަމަޖެހިފައި އޮތީ ފެބުރުއަރީ މަހުގެ ފުރަތަމަ ހަފްތާގެ ތެރޭގައި ބޭއްވުމަށް ކަމަށެވެ. އަދި އެބައްދަލުވުންތަކުގައި ދެޤައުމުގެ މެދުގައި މިހާރު ހުރި މައްސަލަތަކާއި ގުޅޭ ގޮތުން ބިނާކުރަނިވި މަޝްވަރާތަކެއް ކުރެވޭނެ ކަމުގައިވެސް މިިނިސްޓަރ ވިދާޅުވިއެެވެ.

ރާއްޖޭގައި ތިބި އިންޑިއާ ސިފައިން މާރިޗު މަހުގެ 15ގެ ކުރިން އަނބުރާ ގެންދިޔުމަށް ދިވެހި ސަރުކާރުން ވަނީ އިންޑިއާ ސަރުކާރަށް ހުށައަޅާފައެެވެ. އަދި ރާއްޖެއާ އިންޑިއާ އާއި ދެމެދު ސޮއި ކުރެވިފައިވާ އެއްބަސްވުންތައްވެސް ރާއްޖެއިން ދިރާސަާކުރަމުން ދާއިރު، އިންޑިއާ ސަރުކާރާ އެކު ގާއިމުކޮށްފައިގާ ހައިޑްރޯގްރަފީ އެއްބަސްވުން އައު ނުކުރުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. ޖޫން 7, 2024ގެ ނިޔަލަށް އެ އެއްބަސްވުމުގެ މުއްދަތުވެސް ހަމަވާއިރު، އެ އެއްބަސްވުންވެސް އިތުރަށް އާނުކުރުމަށް ސަރުކާރުން ނިންމެވީ، އެ އެއްބަސްވުމުގެ ސަބަބުން ދިވެހިރާއްޖެއަށް ގެއްލުންތައް ލިބޭކަން ފާހަގަކުރެއްވުމަށްފަހުގައެވެ.

އިންޑިއާ އާއި ދިވެިރާއްޖެއާ ދެމެދު މިހާރު ކުރި މައްސަލަތައް ވާހަކަދައްކައިގެން ޙައްލުކުރުމަށް ދެޤައުމުގެ އެންމެ އިސްފަރާތްތައް ހިމެނޭ ހައިލެވެލް ކޮމިޓީއެއް އުފެއްދެވުމަށް ނިންމެވީ، ކޮޕް-28 ސަމިޓުގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ރަސްމީ ބައްދަލުކުރެއްވުމުގައި ކުރެއްވި މަޝްވަރާތަކަށް ފަހުގައެވެ. މިގޮތުން އެކޮމިޓީގެ ފުރަތަމަ ބައްދަލުވުން މިޖެނުއަރީ މަހުގެ ތެރޭގައި ރާއްޖޭގެ ފޮރިން މިނިސްޓްރީގައި ބާއްވާފައި ވާއިރު،ދެވަނަ ބައްދަލުވުން ބޭއްވުމަށް ހަމަޖެހިފައި ވަނީ އިންޑިއާގައި ކަމަށް އިންޑިއާގެ އެކްސްޓަރނަލް އެފެއާޒް މިނިސްޓްރީން ވަނީ ހާމަކޮށްފައެވެ.

ރާއްޖޭގައި ތިބި އިންޑިއާ ސިފައިން ބޭލުމަކީ، ރިޔާސީ އިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދިވެހި ރައްޔިތުންނަށް ވަޢުދުވެވަޑައިގަން މުހިއްމު އެއްކަންތަކެވެ.