ރާއްޖޭގެ ފޮރިން މިނިސްޓަރ މޫސާ ޒަމީރު އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. އެސް ޖައިޝަންކަރް އާއި ބައްދަލު ކުރައްވައިފިއެވެ.

ދެބޭފުޅުން ބައްދަލުކުރައްވާފައި ވަނީ، ޔުގަންޑާގެ ކަމްޕާލާގައި މިހާރު ކުރިޔަށްދާ ނޮން-އެލައިންޑް މޫވްމަންޓް (ނާމް)ގެ 19 ވަނަ ސަމިޓުގެ ހަވާސާގެ ތެރެއިންނެވެ.

މިބައްދަލުވުމާއި ގުޅޭ ގޮތުން، އިންޑިއާގެ އެކްސްޓަރނަލް އެފެއާޒް މިނިސްޓަރ ވިދާޅުވީ، އިންޑިއާ އާއި ދިވެހިރާއްޖޭގެ ގުޅުމާއި ބެހޭ ގޮތުންނާއި، ނޮން-އެލައިންޑް މޫވްމަންޓް (ނާމް) އާއި ގުޅޭ ގޮތުން މަޝްވަރާ ކުރެވުނު ކަމަށެވެ.

ރާއްޖޭގެ ފޮރިން މިނިސްޓަރ މޫސާ ޒަމީރު "ނޫން.އެމްވީ"އަށް ވިދާޅުވީ، އިންޑިޔާ ސިފައިން އަނބުރާ ގެންދިއުމާއި، އިންޑިއާގެ އެހީގައި މިހާރު ކުރިއަށްދާ ތަރައްޤީގެ މަޝްރޫޢުތައް އަވަސްކުރުމާއި، ސާކާއި ނާމްގެ ތެރެއިން ދެޤައުމުގެ އެއްބާރުލުން ދިނުމާ ބެހޭގޮތުން މަޝްވަރާކުރެވުނު ކަމަށެވެ.

މީގެ އިތުރުން، އިންޑިއާ ސިފައިން އަނބުރާ ގެންދިޔުމާއި ދެޤައުމުގެ މެދުގައި މިހާރު ކުރިޔަށްދާ މަތީ ފަންތީގެ މަޝްވަރާތަކާ ބެހޭގޮތުންވެސް ދެބޭފުޅުން މަޝްވަރާކުރެއްވި ކަމަށެވެ. 

ޔުގަންޑާގެ ކަމްޕާލާގައި ދެޤައުމުގެ ފޮރިން މިނިސްޓަރުންގެ މެދުގައި ކުރެވުނު މި މަޝްވަރާތަކަށް ފަހު މިނިސްޓަރ މޫސާ ޒަމީރު ވިދާޅުވީ، ރާއްޖެއާ އިންޑިއާ އާއިއެކު ކުރިޔަށްދާ މަތީ ފަންތީގެ މަޝްވަރާބައްދަލުވުންތަކުގެ ދެވަނަ ބައްދަލުވުން ފެބުރުއަރީ މަހުގެ ފުރަތަމަ ހަފްތާގައި ބޭއްވުމަށް މިހާރު ވާހަކަދެކެވިފައިވާ ކަމަށެވެ.

އިންޑިއާގެ އެކްސްޓަރނަލް އެފެއާޒް މިނިސްޓްރީން ހާމަކޮށްފައިވާ ގޮތުގައި ރާއްޖެއާ އިންޑިއާ އާއިއެކު ކުރިޔަށްދާ މަތީ ފަންތީގެ މަޝްވަރާބައްދަލުވުންތަކުގެ ދެވަނަ ބައްދަލުވުން ބާއްވާނީ އިންޑިއާގައެވެ.

ރާއްޖޭގައި ތިބި އިންޑިއާ ސިފައިން މާރިޗު މަހުގެ 15 ވަނަ ދުވަހުގެ ކުރިން އަނބުރާ ޤައުމަށް ގެންދިޔުމަށް ދިވެހި ސަރުކާރުގެ ފަރާތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހުށައަޅުއްވާފައެވެ.