ކަރަންޓްގެ ޚިދުމަތް ދިނުމާއި، ސަލާމަތީ ކަންކަމާއި ގުޅޭ ގޮތުން ފުލުހުންނާއި ސްޓެލްކޯއިން މަޝްވަރާކޮށްފިއެވެ.

ސްޓްލެްކޯއިން ހާމަކޮށްފައިވާ ގޮތުގައި، ސްޓެލްކޯ އާއި ފުލުހުންގެ އެންމެ އިސްވެރިން އަދި ކަމާއި ގުޅޭ ދެމުއައްސަސާތަކުގެ މުވައްޒަފުންނާއި ބައްދަލުކޮށް މައިގަނޑު ތިން ކަމެއްގައި ވަނީ މަޝްވަރާކޮށްފައެވެ. އޭގެ ތެރެއިން އެއްކަަމަކީ، ފުލުހުންގެ ބެލުމުގެ ދަށުގައި އޮންނަ ދޫނިދޫގެ ކަރަންޓްގެ ޙާލަތު ރަނގަޅުކުރުމާއި ގުޅޭ މަޝްވަރާތަކެކެވެ. މީގެ އިތުރުން ދޫނިދޫގައި މިހާރު ހުރި ޕަވަރ ސިސްޓަމްގެ އެސެސްމެންޓްހަދައި އެސިސްޓަމް އަޕްގްރޭޑްކުރުމާއި. ފުލުހުންގެ އިންޖީނިއަރުންނަށް ސްޓެލްކޯގައި ޖޮބް އެޓޭޗްމަންޓް ޓްރެއިނިންގ ދިނުމާއި ގުޅޭގޮތުން ފުލުހުންވަނީ، ސްޓެލްކޯއާއި އެކު މަޝްވަރާކޮށްފައެވެ.

މީގެ އިތުރުން ސްޓެލްކޯއިން ވަނީ، އެ ކުންފުނީގެ ކްރިޓިކަލް އިންފްރާސްޓްރަކްޗަރތަކުގެ ސެކިއުރިޓީ ކަށަވަރުކުރުމާއި ގުޅޭގޮތުން އަދި ކަރަންޓް ކެނޑޭ ވަގުތުތަކުގައި މިކުންފުންޏާއި، ފުލުހުންނާއި ދެމެދު މައުލޫމާތު ބަދަލުކުރެވޭނެ ނިޒާމެއް ގާއިމް ކުރުމާއި ގުޅޭ ގޮތުން މަޝްވަރާކޮށްފައެވެ.

ސްޓެލްކޯއަކީ މާލެ ސަރަހައްދުގައި ކަރަންޓްގެ ޚިދުމަތް ދިނުމަށް އުފައްދާފައިވާ ސަރުކާރުގެ ކުންފުންޏެވެ.