ވެލާނާ އިންޓަރނޭޝަނަލް އެއާޕޯޓުގެ އައު ކާގޯ ޓާމިނަލް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުޅުއްވައި ދެއްވައިފިއެވެ.

ވެލާނާ އިންޓަރނޭޝަނަލް އެއާޕޯޓުގެ ކާގޯ ޓާމިނަލް ހުޅުވުމުގެ ރަސްމިއްޔާތު ބާއްވާފައި ވަނީ މިއަދު ހަވީރު ވެލާނާއިންޓަރނޭޝަނަލް އެއާޕޯޓުގެ ކާގޯ ޓަރމިނަލްގައެެވެ.

ކާގޯޓާމިނަލް ހުޅުއްވައި ދެއްވުމަށް ފަހުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ، އެޓާމިނަލްގެ ޚިދުމަތްތަކާއި އިންތިޒާމްތައް ހަމަޖެހިފައި ހުރިގޮތް ބައްލަވާލައްވާފައެވެ.

މިއަދު ހުޅުވި މިކާގޯ ޓާމިނަލްއަކީ ކުރިން ބޭނުން ކުރަމުން އައި ކާގޯ ޓާމިނަލްއަށް ވުރެ 222 އިންސައްތަ ބޮޑު ޓަރމިނަލެކެވެ. އައު ކާގޯ ޓާމިނަލުގެ ބޮޑު މިނަކީ، 11628.90 އަކަ މީޓަރަވެ. ކުރިން ބޭނުން ކުރަމުން އައި ޓަރމިނަލަކީ، 8514 އަކަމީޓަރުގެ ޓަރމިނަލެކެވެ.

ވެލާނާ އިންޓަރނޭޝަނަލް އެއާޕޯޓުގައި މިހާތަނަށް ބޭނުން ކުރަމުން އައި ކާގޯޓާމިނަލަކީ އެކިފަހަރުމަތިން ބޮޑުކުރެވިފައިވާ އިމާރާތާކަށް ވާއިރު އެ އެއާޕޯޓުގައި ކާގޯގެ ޚިދުމަތްތައް ދެމުން އަންނަތާ 40 އަހަރުވެފައި ވުމާއި އެކު ޒަމާނީ ޖާގަ ތަނަވަސް ކާގޯޓާމިނަލަކަށް އޮތީ ވަރަށް ބޮޑަށް ބޭނުން ވެފައެވެ.

މިއަދު ހުޅުވި އައި ކާގޯ ޓަމިނަލުން އަހަރަކު 120000ޓަނުގެ ކާގޯ ހޭންޑްލްކުރެވޭނެއެވެ. އަދި އައު ކާގޯޓަރމިނަލުގައި 9 ގޭޓާއި، 9 އެކްސްރޭ މެޝިންވެސް ހުންނާނެއެވެ. 

މީގެ އިތުރުން އައު ކާގޯ ޓަރމިނަލްގައި 3 ބުރީގެ އޮފީސް އިމާރާތެއް ހުރި އިރު، ކާގޯގެ ޚިދުމަތްދޭ އެއާލައިންތަކާއި ކާގޯ ބުރޯކަރުންގެ 55 އޮފީސްވެސް ހުންނާނެއެވެ.

2016 ވަނަ އަހަރު ފެށި ވެލާނާ އިންޓަރނޭޝަނަލް އެއާޕޯޓު ތަރައްޤީކުރުމުގެ މަޝްރޫއުގެ ތެރެއިން، އައި ކާގޯ ޓާމިނަލް އިމާރާކުރުމަށް ބިންގާ އަޅާފައި ވަނީ 2018 ވަނަ އަހަރުގެ ޖެނުއަރީ މަހުގެ ތެރޭގައެވެ.