Advertisement
މޭޔަރު ހޮވުމަށް މިއަދު ބޭއްވި އިންތިޚާބުގައި އާޒިމް ވޯޓުކަރުދާސްކޮޅު ފޮއްޓަށް ލައްވަނީ ---
މާލެ ސިޓީގެ މޭޔަރުކަމުގެ ގޮނޑި ކާމިޔާބު ކުރެއްވި އާޒިމަށް ރައީސް މަރުހަބާ ވިދާޅުވެއްޖެ
މިއަދު ބޭއްވި މާލޭ ސިޓީ މޭޔަރު ހޮވުމުގެ އިންތިޚާބު ކާމިޔާބު ކުރެއްވި އާދަމް އާޒިމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގުޅުއްވައި މަރުހަބާ ވިދާޅުވެއްޖެއެވެ.
މިއަދު ބޭއްވި އިންތިޚާބު އިދިކޮޅު އެމްޑީޕީގެ ކެންޑިޑޭޓް އާދަމް އާޒިމް ކާމިޔާބު ކުރެއްވީ ބޮޑު ތަފާތަކުންނެވެ. މިއިންތިޚާބުގައި އާދަމް އާޒިމް ވޯޓުލީ މީހުންގެ ގާތްގަނޑަކަށް %44 އިންސައްތަ ވޯޓު ހޯއްދެވިއެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި އިންތިޚާބު ކާމިޔާބު ކުރެއްވި އާދަމް އާޒިމަށް ފޯނުން ގުޅުއްވައި، ރައީސުލްޖުމްހޫރިއްޔާ މަރުޚަބާ ވިދާޅުވެ، އެދި ވަޑައިގެންނެވީ ސަރުކާރާއިއެކު މާލޭ ސިޓީގެ ރައްޔިތުންނަށް ބޭނުންވާ ކަންކަން ކުރުމުގައި ގުޅިގެން މަސައްކަތްކޮށްދެއްވުމަށެވެ. އަދި ސަރުކާރުގެ ފުރިހަމަ އެއްބާރުލުން ސިޓީ ކައުންސިލަށާއި މޭޔަރަށް ލިބިވަޑައިގަންނަވާނެ ކަމުގައިވެސް ރައީސުލްޖުމްހޫރިއްޔާ ވާނީ ވިދާޅުވެފައެވެ.
މާލޭ ސިޓީ ކައުންސިލްގެ މޭޔަރު ހޮވުމަށް ބައި-އިލެކްޝަން ބާއްވަން ޖެހުނީ އެމަޤާމުގައި ހުންނަވައި، ރިޔާސީ އިންތިޚާބުގައި ވާދަކުރައްވައި، އިންތިޚާބު ޑރ. މުޢިއްޒަށް ކާމިޔާބުވެވަޑައިގެންނެވުމުން، އެމަނިކުފާނު މޭޔަރު ކަމުގެ މަޤާމުން ވަކިވެވަޑައިގަންނަވަން ޖެހުމުގެ ސަބަބުންނެވެ.
