އިންޑިއާގެ ބޮޑުވަޒީރު ނަރެންދުރަ މޯދީ، އިންޑިއާގެ ޓެރިޓަރީއެއްގެ ގޮތުގައި އޮތް ލަކްޝަދީބަށް ކުރެއްވި ރަސްމީ ދަތުރުފުޅުގައި، ލަކްޝަދީބުގެ ޓުއަރިޒަމް ޕްރޮމޯޓް ކުރެއްވުމަށް، ސޯޝަލްމީޑިއާއަށް ދޫކޮށްލި ޕޯސްޓްތަކާ ގުޅިގެން އެ މަނިކުފާނާއި އެ ގައުމުގެ ސިޔާސީ ލީޑަރުންނަށް ނިސްބަތްވާ ގޮތަށް މީސްމީޑިއާގައި ބޭއަދަބީ ކޮމެންޓުކުރުން ދިވެހި ސަރުކާރުން ކުށްވެރިކޮށްފިއެވެ.

ފޮރިން މިނިސްޓްރީއިން މިއަދު ނެރުނު ބަޔާނެއްގައި ވާގޮތުން، ހިޔާލު ފާޅު ކުރުމުގެ މިނިވަންކަމަކީ އޮންނަން ޖެހޭނެކަމެއް ކަމަށާއި، ނަމަވެސް އެ މިނިވަންކަމުގެ މިންތައް ފަހަނައަޅާ ގޮސް، ނަފްރަތާއި ފުރައްސާރަ ފަތުރާ، ދެ ގައުމެއްގެ ދޭތެރޭގައި އޮތް ބަދަހި ގުޅުމަށް ހީނަރުވާ ގޮތަށް ބަސް ބުނެ ހެދުމަކީ އެކަން ކުރަންވާނެ ގޮތް ނޫން ކަމަށެވެ.

އެ ބަޔާނުގައި އިތުރަށް ފާހަގަކޮށްފައިވާ ގޮތުން، އެފަދަ ފަރާތްތަކާ މެދު ކަމާ ގުޅުން ހުރި އިދާރާތަކުން ފިޔަވަޅު އަޅާނެއެވެ.

މި މައްސަލަ ހޫނުވެފައިވަނީ މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރުންގެ މަގާމުގައި ތިއްބެވި މަރިޔަމް ޝިއުނާ އާއި މަލްޝާ ޝަރީފް ހިމެނޭހެން، ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުން، އެ ބޭފުޅުންގެ ރަސްމީ އެކައުންޓުތަކުން މީސް މީޑިއާގައި ބޭނުން ކުރި ބޭއަދަބީ ބަސްތަކުގެ ސަބަބުންނެވެ.

ސަރުކާރުން މި ބަޔާން ނެރުނުއިރު، މިކަމާ ގުޅިގެން ގިނަ ބަޔަކު އަންނަނީ އެ އޮފިޝަލުންނަށް ފިޔަވަޅު އެޅުމަށް ގޮވާލައްވަމުންނެވެ.