ވެލާނާ އިންޓަރނޭޝަނަލް އެއާޕޯޓުގެ ތަރައްޤީއަށް މިހާރު ހިންގެމުންދާ މަސައްކަތްތަކުގެ ބޮޑުބައެއް މިއަހަރުގެ ނިޔަލަށް ނިމި، އިތުރު %25 ވަޒީފާ މޯލްޑިވްސް އެއާޕޯޓްސް ކޮމްޕެނީ ލިމިޓެޑްގައި އުފެދިގެންދާނެކަމަށް އެކުންފުނީގެ ސީއީއޯ އަދި މެނޭޖިންގ ޑައިރެކްޓަރ އިބްރާހީމް ޝަރީފް މުހައްމަދު ވިދާޅުވެއްޖެއެވެ.

ޝަރީގް މިހެން ވިދާޅުވީ، ވެލާނާ އިންޓަރނޭޝަނަލް އެއާޕޯޓު ތަރައްޤީ ކުރުމަށް މިސަރުކާރުން ފެށުމަށް ތައްޔާރުވަމުން އަންނަ، ތަރައްޤީގެ ބިޔަ މަޝްރޫޢު އިފްތިތާޙްކުރުމުގެ ގޮތުން ބޭއްވި ޖަލްސާގައި ވާހަކަފުޅު ދައްކަވަމުން ކަމަށެވެ.

ޝަރީފް ވިދާޅުވީ، ހިނގަމުންދާ މަޝްރޫޢުތަކުގެ ބޮޑު ބައެއް ނިމިގެންދާއިރު، އެކުންފުނީގައި މުޅިން އަލަށް ހާހަކަށްވުރެ ގިނަ ވަޒީފާ އުފެދިގެންދާނެ ކަމަށެވެ.

ޝަރީފް ވިދާޅުވީ، ވެލާނާ އިންޓަރނޭޝަލް އެއާޕޯޓު ތަރައްޤީކުރުމަށް މިހާރު ހިނގަމުންދާ މަޝްރޫޢު، ތަކުގެ ތެރެއިން އައު ޓަރމިނަލް ނިންމައި ޚިދުމަތް އަވަހަށް ފެށުމަށް ގިނަ މަސައްކަތްތަކެއް ކުރެވެމުން އަންނަ ކަންވެސް ޝަރީފް ފާހަގަކުރެއްވިއެވެ. މިގޮތުން އެކަމަަށް ބޭނުންވާ ޓާސްކްފޯސްތައް އުފައްދައި، މަސައްކަތް އަވަސް ކުރާނެ އިންތިޒާމްތައް ހަމަޖެހި ވަނީ ރޭވިފައި ކަމުގައިވެސް އޭނާ ވިދާޅުވިއެވެ. އަދި ރައީސުލްޖުމްހޫރިއްޔާގެ އިރުޝާދާއި އެއްގޮތަށް ސަރުކާރުން ބޭނުންވާ ސްޕީޑުގައި އެމަސައްކަތްތައް އަވަހަށްކޮށް ނިންމާލެވޭނެ ކަމުގައިވެސް ޝަރީފް ވިދާޅުވިއެވެ.

ވެލާނާ އިންޓަރނޭޝަނަލް އެއާޕޯޓު ތަރައްޤީކުރުމުގެ އައު މަޝްރޫޢަކީ، މުޅި ރާއްޖޭގެ އިޤުތިޞާދު ބަދަލުކޮށްލާނޭ މަޝްރޫޢަަކަށްވެސް ވެގެންދާނެކަން ޝަރީފްގެ ވާހަކަފުޅުގައި ވަނީ ފާހަގަކުރައްވާފައެވެ. މިހާރު ހުޅުވުމަށް ތައްޔާރުވަމުން އަންނަ ޓާމިނަލަކީ، އަހަރަކު 7 މިލިއަން ފަސިންޖަރުންނަށް ޚިދުމަތް ދެވޭނެ ޓާމިނަލެއްކަން ފާހަގަކުރައްވައި ޝަރީފް ވިދާޅުވީ، އަލަށް ތަރައްޤީކުރެވޭ، ޓާމިނަލަކީ، އަހަރަކު ފަންސަވީސް މިިލިޔަން ފަތުރުވެރިންނަށް ޚިދުމަތްދެވޭނެ ޓަރމިނަލަކަށް ވެގެންދާނެ ކަމަށެވެ.