ރައީސުލްޖުމްހޫރިއްޔާ، ޑރ. މުހައްމަދު މުޢިއްޒުގެ ރިޔާސީ ވަޢުދުފުޅާއި އެއްގޮތަށް، ހުޅުމާލޭގެ މުނިސިޕަލް މަސައްކަތްތައް، ސިޓީ ކައުންސިގެ ދަށަށް ބަދަލުކުރުމާއި ގުޅޭ ގޮތުން މިއަދު މެމޮރަންޑަމް އޮފް އަންޑަސްޓޭންޑިންގ (ފަހުމުނާމާ) އެއްގައި ސޮއެކޮށްފިއެވެ.

މިފަހުމުނާމާގައި ސޮއެކޮށްފައި ވަނީ އެޗްޑީ ސީ އާއި މާލޭ ސިޓީ ކައުންސިލާއި ފިނޭންސް މިނިސްޓްރީގެ ފަރާތުންނެވެ. 

މާލޭ ސިޓީކައުންސިލްގެ ދަށަށް ހުޅުމާލޭގެ މުނިސިޕަލް ޚިދުމަތްތަކާއި ގުޅޭ އެންމެހައި ކަންކަން، މިހިނގާ ޖެނުއަރީ މަހުގެ 31 ގެ ކުރިން ނިންމުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. މިގޮތުން އެމަނިކުފާނު ނިންމަވާފައި ވަނީ، ހުޅުމާލޭގެ މުނިސިޕަލް ބިންތަކާއި ސާމާނާއި މެޝިނަރީޒް އަދި ހުރިހާ މުވައްޒަފުންވެސް މާލޭ ސިޓީ ކައުންސިލްގެ ދަށަށް ބަދަލުކުރުމަށެވެ. އަދި މުވައްޒަފުން ބަދަލު ކުރާއިރު ބަދަލުކުރާނީ، އާބަންކޯގައި މުވައްޒަފުން ތިބި އިރު ލިބެމުން އަންނަ މުސާރަ އާއި އިނާޔަތްތައް ކުޑަނުވާނޭ ގޮޮތަށް ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ޖެނުއަރީ 1 އިން ފެށިން ހުޅުމާލޭގެ މުނިސިޕަލް ޚިދުމަތްތައް މާލޭގެ ސިޓީ ކައުންސިލްގެ ދަށަށް ބަދަލުކުރުމަށް ރައީސުލްޖުމްހޫރިއްޔާ ނިންމަވާފައި ވަނީ، މިހުސްވި ޑިސެމްބަރު މަހުގެ 31 ވަނަ ދުވަހު ބޭއްވި ވަޒީރުންގެ މަޖިލީހުގައި ކުރެވުނު މަޝްވަރާތަކަށް ފަހުގައެވެ.