ރައްޔިތުންގެ މަޖިލީހުގެ މެމްބަރުންތަކެއް ރާއްޖޭގައި ހުންނަވާ އިންޑިއާ ސަފީރާ ބައްދަލުކުރިކަމަށް ބުނެ ސަރުކާރާއި ސަރުކާރަށް ތާއީދުކުރާ ފަރާތްތަކުން ފެތުރި ވާހަކަތައް އިންޑިއާ ހައިކޮމިޝަނުން ދޮގުކޮށްފިއެވެ.

ހުޅުމާލޭގައި ހުންނަ އަމީން އެވެނިއުގެ އިމާރާތުގެ ފޮޓޯތަކެއް އާއްމުކޮށް މަޖިލީހުގެ ރައީސް މުހައްމަދު އަސްލަމާއި އެމްޑީޕީގެ އެހެން ބައެއް މަޖިލިސް މެމްބަރުން އިންޑިއާ ސަފީރާއި ބައްދަލުކުރިކަމަށް ބުނެ އިއްޔެ ހަވީރުން ފެށިގެން ސޯޝަލްމީޑިއާގައި ހަޤީޤަތެއް ނެތް އެވާހަކަތައް ފަތުރާފައި ވަނީ ސަރުކާރަށް ތާއީދުކުރާ ފަރާތްތަކުންނާއި ސަރުކާރުގެ އެކި ސިޔާސީ މަޤާމުތަކުގައި ތިއްބެވި ބޭފުޅުންނެވެ.

ރޭ ޕީއެންސީއާ އެމްޑީޕީގެ 13 މަޖިލިސް މެމްބަރުން ގުޅުނު ޖަލްސާގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުވެސް އެވާހަކަފުޅު ދެއްކެވިއެވެ.

ރައީސުލްޖުމްހޫރިއްޔާ އާއި ސަރުކާރުގެ އިސްވެރިން ކުރި ތުހުމަތުތައް އިންޑިއާާ ހައިކޮމިޝަނުން މިރޭ ދޮގުކުރި އިރު، ރޭގައި ރައްޔިތުންގެ މަޖިލީހުގެ މެމްބަރުންވެސް ވަނީ އެވާހަކަތައް ދޮގުކޮށްފައެވެ. ނުރަނގަޅު މައުލޫމާތެއްގެ މައްޗަށް އަދި ޚާއްޞަކޮށް ސޯޝަލްމީޑިއާގައި ބަޔަކު ފަތުރާ އެއްޗެއްގެ ހަޤީޤަތް އެނގުމުގެ ކުރިން ރައީސުލްޖުމްހޫރިއްޔާ އެގޮތަށް ވާހަކަފުޅު ދެއްކެވުންވެސް، އިދިކޮޅު ފަރާތްތަކުން ފާހަގަކޮށްފައިވަނީ ވަރަށް ޒިންމާދާރުކަން ކުޑަ ކަމެއްގެ ގޮތުގައެވެ.

ރޭގެ ޖަލްސާގައި ރައީސް ޑރ. މުހައްމަދު މުޢިއްޒު ވަނީ އިންޑިއާ އާއި މެދު ވަރަށް ހަރުކަށި ބަހުރުވަޔަކުން ވާހަކަފުޅު ދައްކަވައި ދިވެހިރާއްޖެއަށް އިންޑިއާގެ އެހީ ބޭނުން ނުވާކަމުގައި ނުސީދާ ބަހުން ވިދާޅުވެފައެވެ.