ރައީސް ޑރ. މުޙައްމަދު މުޢިއްޒާއި ދެކޮޅަށް ނެގުމަށް އެ މަސައްކަތްކުރާ ވޯޓު (މަޤާމުން ޢަޒުލުކުރުމުގެ ވޯޓު) ނެގުމުގައި އިނގިލި ބުރިކޮށްލިޔަސް އެއްކޮޅަށް ވޯޓު ނުދޭނެ އެމްޑީޕީގެ މަޖިލިސް މެމްބަރުން އެބަތިއްބެވިކަމަށާއި އެކަން އެނގިވަޑައިގަންނަވާ ކަމުގައި، ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިރޭ ބޭއްވި ޕީއެންސީގެ ޚާއްޞަ ޖަލްސާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ. މިރޭ ޕީއެންސީން ބޭއްވި ޚާއްޞަ ޖަލްސާއަކީ، އެމްޑީޕީ ދޫކުރައްވައި، ޕީއެންސީއާ ގުޅިވަޑައިގެންނެވި 13 މެމްބަރަކު އެޕާޓިއަށް ސޮއިކޮށް މެމްބަރޝިޕް ފޯމް ހަވާލުކުރުމަށް ބޭއްވި ޖަލްސާއެކެވެ.

ޕީއެންސީއަށް ގުޅިވަަޑައިގެންނެވި، އެމްޑީޕީގެ މެމްބަރުންނަށް ތަޢުރީފްކުރައްވައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ، އެބޭފުޅުން އެ ޚިޔާރު ކުރެއްވީ ޤައުމުކަމަށާއި އެކަމަށް ފަށްފަށުން ޝުކުރުދަންނަވާ ކަމަށެވެ. އަދި މަޖިލީހުގެ އިތުރު މެމްބަރުން ޤައުމީ ސަފަށް ވަޑައިގަންނަވާނެކަމަށް އުއްމީދުކުރައްވާކަމުގައިވެސް އެމަނިކުފާނު ވިދާޅުވިއެވެ.

ޕީއެންސީއާ މިރޭ ރައްޔިތުންގެ މަޖިލީހުގެ 13 މެމްބަރަކު ގުޅިވަޑައިގެންނެވީ، ރިޝްވަތުގެ ގޮތުގައި ފައިސާ ނަންގަވައި އަދި ސަރުކާރުގެ ތެރެއިން ނާޖާއިޒް މަންފާ އާއި ނުފޫޒް ހޯއްދެވުމަށްކަމަށް އާއްމުންނާއި ސިޔާސީ ފަރާތްތަކުންވެސް ތުހުމަތު ކުރެއެވެ. އެހެން ނަމަވެސް އެމެމްބަރުންނަށް ފައިސާ އާއި މަޤާމު ނުވަތަ އެހެންވެސް ހުށައެޅުންތަކެއް ހުށައެޅިކަމަށް ކުރެވޭ ތުހުމަތުތައް ސަރުކާރުން ވަނީ ދޮގުކޮށްފައެވެ.

ސަރުކާރުން މެމްބަރުންނަށް ރިޝްވަތުގެ ފައިސާ އާއި އެހެނިހެން މަންފާތައް ހުށައެޅިކަމުގެ ތުހުމަތު ދޮގުކޮށްފައި ވީނަމަވެސް މިރޭ ޕީއެންސީއަށް ސޮއެ ކުރެއްވި ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފްގެ ދަރިކަނބަލަކު ހުންނެވި ސިޔާސީ ވަޒީފާއެއްގެ މުއްދަތު ސަރުކާރުން ވަނީ އިތުރުކޮށްދީފައިކަން މީޑިއާއަށް ހާމަވެފައިވެއެވެ.