މިފްކޯ ހިންގުމުގައި މަސްވެރިންގެ ދައުރު ފުޅާކުރުމުގެ ސިޔާސަތުގެ ދަށުން، މިފްކޯ ބޯޑުގައި ބައިވެރިވާން ޝައުގުވެރިވާ މަސްވެރިންނަށް ފުރުސަތު ހުޅުވާލައިފިއެވެ.

މޯލްޑިވްސް ފިޝަރީޒް އިންޑަސްޓްރިއަލް ކޮމްޕެނީ ލިމިޓެޑް (މިފްކޯ) ބޯޑުގައި މަސްވެރިން ތަމްސީލް ކުރާނެ މަސްވެރިއަކު ބޯޑު މެމްބަރެއްގެ ގޮތުގައި އައްޔަނުކުރުަމަށްޓަކައި، އެކަމަށް ޝައުޤުވެރިކަން ފާޅުކުރުމަށް ފުރުޞަތު ހުޅުވާލާފައި ވަނީ މިއަދުއެެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ބުނީ، ސަރުކާރުގެ ފުރަތަމަ “ހަފްތާ 14"ގެ މަގުޗާޓުގައި ހިމަނާފައިވާ، މިފްކޯ ހިންގުމުގައި މަސްވެރިންގެ ދައުރު ފުޅާކުރުމުގެ މަސައްކަތްތަކުގެ ތެރެއިން، މިފްކޯގެ ބޯޑުގައި މަސްވެރިން ތަމްސީލުކުރާނެ ފަރާތެއް ޢައްޔަނު ކުރުމަށްޓަކައި ބޯޑު މެންބަރުކަމުގެ މަގާމަށް ކުރިމަތިލުމުގެ ފުރުޞަތު ހުޅުވާލާފައި ވަނީ މިއަދުންފެށިގެން، 2024 ޖެނުއަރީ 11 ވަނަ ދުވަހު މެންދުރު 13:30 ގެ ނިޔަލަށް ކަމަށެވެ.

މިފްކޯގެ ބޯޑުގައި މަސްވެރިން ތަމްސީލުކުރުމަށް ކުރިމަތިލައި ޢައްޔަންކުރާ މީހުންގެ ކިބައިގައި، ހުންނަންޖެހޭ ޝަރުޠުތަކުގެ ތެރޭގައި؛

(ހ) ދިވެހި ރައްޔިތަކު ކަމުގައިވުން؛

(ށ) މަސްވެރިކަމުގައި މިހާރުވެސް ޙަރަކާތްތެރިވާ ފަރާތަކަށްވުން؛

(ނ) އުމުރުން 18 އަހަރު ވެފައިވުން؛

(ރ) ޖިނާއީ ކުށެއް ކުރިކަން ސާބިތުވެ، 12 (ބާރަ) މަސްދުވަހަށްވުރެ ދިގުމުއްދަތެއްގެ ޙުކުމެއް ތަންފީޛުކުރަމުންދާ މީހަކު ކަމުގައި ނުވުމާއި، އަދި ޖިނާއީ ކުށެއް ކުރިކަން ސާބިތުވެ، 12 (ބާރަ) މަސްދުވަހަށްވުރެ ދިގުމުއްދަތެއްގެ ޙުކުމެއް ކޮށްފައިވާ މީހަކުނަމަ އެ ޙުކުމެއް ތަންފީޛުކޮށް ނިމުނުތާ، ނުވަތަ އެ ޙުކުމުން ކަނޑައެޅުނު އަދަބު މަޢާފްކުރެވުނުތާ 5 (ފަހެއް) އަހަރު ވެފައިވާ މީހަކު ކަމުގައިވުން؛ ހިމެނެއެވެ.

ފިޝަރީޒް މިނިސްޓްރީން ބުނީ، މިފްކޯގެ ބޯޑަށް ކުރިމަތިލާާން އެދޭ މަސްވެރިން އެކަމަށް އެދޭ ފޯމް، ފުރިހަމަ ކުރެއްވުމަށްފަހު ފޯމާއެކު ހުށަހަޅަންޖެހޭ ލިޔުންތައް މިނިސްޓްރީގެ އީމެއިލް އެޑްރެސް [email protected] އަށް ފޮނުއްވުން އެދޭކަމަށެވެ.