ސަރުކާރު ހިންގާ ޕާޓީގެ ގޮތުގައި މިހާރު އޮތް، ޕީޕަލްސް ނެޝަނަލް ކޮންގްރެސް، ޕީއެންސީގެ ވަރަށް ޚާއްޞަ ޖަލްސާއެއް މިރޭ، ބޭއްވުމަށް ހަމަޖައްސާފައިވާކަން އެޕާޓީން އިޢުލާނުކޮށްފިއެވެ.

އެޕާޓީން ހާމަކޮށްފައިވާ މިރޭ ބާއްވާ އެޚާއްޞަ ޖަލްސާގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ބައިވެރިވެވަޑައިގަންނަވާނެއެވެ. މިޖަލްސާ އޮންނާނީ މިރޭގެ، 8:15 ގައި ދަރުބާރުގޭގެ ރަންނަ ބަނޑޭރިި މާލަމުގައިއެވެ.

އިތުބާރު ހުރި ގޮތެއްގައި މިނޫހަށް މަޢުލޫމާތު ދެއްވި ބައެއް ބޭފުޅުން ވިދާޅުވެފައިވާ ގޮތުގައި، ސަރުކާރު ހިންގާޕާޓީ ޕީއެންސީން މިރޭ ބާއްވާ މިޚާއްޞަ ޖަލްސާއަކީ، ރައްޔިތުންގެ މަޖިލީހުގެ އިދިކޮޅު މެމްބަރުންތަކެއް ޕީއެންސީއަށް ސޮއިކުރުން ފާހަގަކުރުމުގެ ގޮތުން ބާއްވާ ޖަލްސާއެކެވެ. މިހާތަނަށް އިދިކޮޅު އެމްޑީޕީގެ މަޖިލިސް މެމްބަރުންގެ ތެރޭގައި ހިމެނޭ 6 މެމްބަރަކު ޕީއެންސީއަށް ގުޅިވަޑައިގަންނަވާއިރު އޭގެ ތެރޭގައި ހިމެނޭ ބައެއް މެމްބަރުން މިރޭގެ ޖަލްސާގައި ބައިވެރިވާނެ ކަމަށް މައުލޫމާތު ލިބިފައިވެއެވެ.