Advertisement
ރައީސް މައުމޫނާއި، ރައީސް ޑރ. މުޢިއްޒު ބޭއްވެވި ބައްދަލުކުރެއްވުމުގެ ތެރެއިން ---
ރައްޔިތުންގެ ލާބައަށް ކުރެވޭ މަސައްތަކާއި ގުޅޭ ގޮތުން ރައީސް މައުމޫނު ރައީސް މުޢިއްޒާއި މަޝްވަރާކުރައްވައިފި
ރައްޔިތުންގެ ލާބައަށް ކުރެވޭ އެހެން މަސައްކަތްތަކާ ގުޅޭގޮތުން ކުރީގެ ރައީސް އަލްއުސްތާޛު މައުމޫނު ޢަބުދުލްޤައްޔޫމާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޝްވަރާކުރައްވައިފިއެވެ.
އެދެބޭފުޅުން ބައްދަލުކުރައްވާފައި ވަނީ، މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމަށް ވަޑައިގެންނެވުމަށްފަހު، ކުރީގެ ރައީސަކާއި އެކު މިގޮތަށް ބޭއްވެވި ފުރަތަމަ ރަސްމީ ބައްދަލުކުރެއްވުމެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، މި ބައްދަލުކުރެއްވުމުގައި ޤައުމުގެ އިޖުތިމާޢީ އަދި ސިޔާސީ ކަންކަމާ ގުޅޭގޮތުން ދެ ބޭފުޅުން މަޝްވަރާ ކުރެއްވިއެވެ.
އެހެން ނަމަވެސް އެބައްދަލުވުމުގައި ދެބޭފުޅުން މަޝްވަރާކުރެއްވި ސިޔާސީ ކަންކަމުގެ ތަފްސީލެއް އެބޭފުޅުން ހާމަކުރައްވާފައެއް ނުވެއެވެ.
މިބައްދަލުކުރެއްވުމާއި ގުޅޭ ގޮތުން ރައީސް މައުމޫނު އެކްސްގައި ލިޔުއްވާފައި ވަނީ، ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށްގޮސް ބައެއްކަންކަމާ މަޝްވަރާ ކޮށްލުމުގެ ފުރުޞަތު ދެއްވިކަމަށްޓަކާ އެމަނިކުފާނަށް ނުހަނު އިޚްލާޞްތެރި ކަމާއެކު ޝުކުރު އަދާކުރައްވާކަމަށެވެ.
ރައީސް މައުމޫނަކީ، ރާއްޖޭގައި މިވަގުތު ހުންނެވި ސިޔާސީ ގޮތުން އެންމެ ތަޖުރިބާކާރުބޭފުޅާއެވެ. ރައީސް މައުމޫނުގެ ދިގު 30 އަހަރުގެ ވެރިކަން ނިމިގެން ދިޔައީ، ދިވެހިރާއްޖެއަށް ޑިމޮކްރަސީ ގެނެސް، ސިޔާސީ އިސްލާޙީ ބަދަލުތަކުގެ ތެރެއިންނެވެ.
