މޯލްޑިވްސް ޕޯޓްސް ލިމިޓަޑް، އެމް.ޕީ.އެލްގެ އިންޓާރންޝިޕް ޕްރޮގްރާމް ފަށައިފިއެވެ. މި އިންޓާރންޝިޕް ޕްރޮގްރާމްތަކަކީ ސާނަވީ އަދި މަތީ ސާނަވީ ތަޢުލީމް ހާސިލްކުރަމުންދާ ދަރިވަރުންނަށް މަސައްކަތު މާހައުލުގެ އަމަލީ ހުނަރުތައް ދަސްކޮށްދީ، ތަޖުރިބާ ހޯދައިދިނުމުގެގޮތުން އެކުންފުނީގެ ލާރނިންގ އެންޑް ޑިވެލޮޕްމަންޓް ޑިޕާޓްމަންޓް (އެލް.ޑީ.ޑީ) އިން ހިންގާ ޕްރޮގްރާމެކެވެ.

އެމްޕީއެލްއިން ބުނީ، މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 24 ޑިސެންބަރ 2023 އިން 4 ޖަނަވަރީ 2024 ގެ ނިޔަލަށް ކަމަށެވެ. އިންޓާރންޝިޕް ޕްރޮގްރާމްގެ ބައިވެރިންނަށް ކުރިއަށް ގެންދިޔަ އޮރިއެންޓޭޝަން ބައްދަލުވުމުގެ ތެރެއިން، ކުންފުނީގެ ސީ.އީ.އޯ މުޙައްމަދު ވަޖީޙް އިބްރާހިމް ވަނީ ޕްރޮގްރާމްގެ ބައިވެރިންނާ ބައްދަލުކުރައްވައިފައެވެ.

އެމް.ޕީ.އެލްއިން ބުނީ މި ޕްރޮގްރާމްގައި މަސައްކަތުގެ އަމަލީ ތަޖުރިބާ ހޯދާއިރު، ކޮންމެ ކުއްޖަކަށްވެސް މެންޓަރއެއް ހަމަޖައްސާނެކަމަށެވެ. އަދި މަސައްކަތުގެ މާޙައުލުގައި ދަރިވަރުންނަށް މަސައްކަތުގެ ހުނަރު ދަސްކޮށްދީ، މަޢުލޫމާތުތައް ދިނުމުގައި އެންމެ ބޮޑު ދައުރެއް އަދާކުރާނީ މެންޓަރގެ ގޮތުގައި ކަނޑައަޅާފައިވާ މުވައްޒަފުންކަމަށް އެމް.ޕީ.އެލްއިން ބުނެއެވެ.

އެމް.ޕީ.އެލްގެ ސީ.އީ.އޯ މުޙައްމަދު ވަޖީޙް އިބްރާހިމް ވިދާޅުވީ، ޕޯޓުގެ ދާއިރާތަކަށް ޒުވާނުންގެ ޝައުގުވެރިކަން އިތުރުކުމަށް އެކުންފުނިން ބޭނުންވާ ކަމަށެވެ. އަދި ޒުވާނުންނަށް ކުރިއަށް ދިއުމަށް ފުރުޞަތުތައް ފަހިކޮށްދިނުމުގައި އެމް.ޕީ.އެލް ދެމި އޮންނާނެކަމަށެވެ. 

މި ޕްރޮގްރާމްގައި ޖުމްލަ 13 ދަރިވަރުން ވަނީ ބައިވެރިވެފައެވެ. މި އަހަރުގެ އިންޓާރންޝިޕް ޕްރޮގްރާމްގައި ދަރިވަރުން ތަމްރީނު ހޯދުމަށް ތަފާތު ދާއިރާތަކެއް ވަނީ ކަނޑައަޅައިފައެވެ. އޭގެ ތެރޭގައި އިންޖީން ރިޕެއަރ އެންޑް މެއިންޓަނަންސް، ފެބްރިކޭޝަން އޮފް ބްރާސް އިމްޕެލާރ، ކާޕެންޓްރީ، ޕަވަރަ ޖެނަރޭޝަން އެންޑް ޑިސްޓްރިބިއުޝަންގެ އިތުރުން އެޗްވީއޭސީ އެންޑް އިލެކްޓްރިކަލް ސާރވިސް، ގްރެފިކް ޑިޒައިނިންގ، ކޮޕީ ރައިޓިންގ، ސިވިލް އިންޖިނިއަރިންގ / ސާރވޭއިން އަދި އާކިޓެކްޗަރަލް ޑްރާފްޓިންގ ހިމެނެއެވެ.