ސަރުކާރުގެ މަސްކުންފުނި މިފްކޯއަކީ ސައްތައިންސައްތަ ސަރުކާރުގެ ހިއްސާވާ ކުންފުންޏަކަށް ބަދަލުކޮށް އެކަމުގެ އެއްބަސްވުމުގައި ސޮއިކޮށްފިއެވެ. މިކަމުގެ އެއްބަސްވުމުގައި ސޮއިކޮށްފައިވަނީ މިއަދު އޮތް ރަސްމިއްޔާތެއްގައެވެ.

މި ރަސްމިއްޔާތުގައި ފިނޭންސް މިނިސްޓްރީގެ ފަރާތުން ސޮއިކުރެއްވީ މިނިސްޓަރ މުޙައްމަދު ސަފީޤްއެވެ. ފިޝަރީޒް މިނިސްޓްރީގެ ފަރާތުން ސޮއިކުރެއްވީ މިނިސްޓަރ އަޙްމަދު ޝިޔާމްއެވެ.

އެސްޓީއޯގެ ފަރާތުން ސޮއިކުރެއްވީ މެނޭޖިން ޑިރެކްޓަރ ސިމާދު އިބްރާހިމްއެވެ. އެލައިޑް އިންޝުއަރެންސްގެ ފަރާތުން ސޮއިކުރެއްވީ މެނޭޖިން ޑިރެކްޓަރ ހުސައިން ލުވައިޒްއެވެ.

މިމަހުގެ 5 ވަނަ ދުވަހު ރައީސް ޑރ. މުޢިއްޒު ވަނީ މިފްކޯ އެސްޓީއޯގެ ދަށުން ބަދަލުކޮށް ސަރުކާރު ހިއްސާވާ ކުންފުންޏަކަށް ހައްދަވާނެކަމަށް ވިދާޅުވެފައެވެ. މީގެ ބޭނުމަކީ މަސްވެރިކަމުގެ ދާއިރާ ހަރުދަނާކޮށް މަސްވެރިންނަށް ވެވަޑައިގެންފައިވާ ވަޢުދު ހާސިލްކުރުމަށް މަގުފަހިކުރުންކަމަށްވެސް ރައީސް ވަނީ ވިދާޅުވެފައެވެ.

އެސްޓީއޯގެ ސަބްސިޑަރީ ކުންފުންޏެއް ގޮތުގައި މިފްކޯ ހަމަޖައްސާފައިވަނީ 2016 ވަނަ އަހަރުގެތެރޭގައެވެ. މިފްކޯއަކީ ސަރުކާރުގެ މަސްކުންފުނީގެ ގޮތުގައި 1993 ވަނަ އަހަރު އުފައްދާފައިވާ ކުންފުންޏެކެވެ. އެކުންފުނީގެ ހަމައެކަނި ބޭނުމަކީ ރާއްޖޭގެ މަސްވެރިކަމުގެ ދާއިރާ ފުޅާކޮށް ރާއްޖޭގެ އިޤްތިޞާދަށް އޭގެ ނަފާ ހޯދައިދިނުމެވެ.