އިންގްލިޝް ޕްރިމިއަރ ލީގުގައި އާދިއްތަ ދުވަހުގެރޭ ލިވަޕޫލް އާއި މެންޗެސްޓަރ ޔުނައިޓެޑް ބައްދަލުކުރި މެޗު 0-0 އިން އެއްވަރުވުމުން، ލިވަޕޫލަށް މި ހަފްތާ ނިންމާލަން ޖެހުނީ ލީގުގެ ދެވަނައިގައެވެ. ލީގުގެ އެއްވަނައަށް އެރީ، ބްރައިޓަންއާ ދެކޮޅަށް ހޯދި 3 ޕޮއިންޓާއެކު އާސެނަލްއެވެ. އާސެނަލް އެ މެޗު ކާމިޔާބު ކުރީ 2-0 އިންނެވެ.

އެންފީލްޑްގައި މި އަހަރު ކުޅުނު ހުރިހާ މެޗެއްގައި ލިވަޕޫލުން ވަނީ ގޯލެއް ކާމިޔާބު ކޮށްފައެވެ. ނަމަވެސް ޔުނައިޓެޑުގެ ގޯލާ އަމާޒުކޮށް ލިވަޕޫލުން ފޮނުވާލި 34 ޝޮޓުގެ ތެރެއިން އެއްވެސް ޝޮޓެއް ގޯލުގެ ތެރެއަށް ފޮނުވާލެވިފައެއް ނުވެއެވެ. މިއީ 2003/04 ގެ ސީޒަނަށްފަހު، މިހާ ގިނަ ހަމަލާ އުފައްދާ، ގޯލެއް ކާމިޔާބު ނުކުރެވި ލެވަޕޫލަށް މެޗު ނިންމާލަން ޖެހުނު ފުރަތަމަ ފަހަރެވެ.

ލީގުގެ އެއްވަނައިގައި އޮތް އާސެނަލްއަށް މިހާރު ލިބިފައިވަނީ 39 ޕޮއިންޓެވެ. ދެވަނައިގައި އޮތް ލިވަޕޫލަށް 38 ޕޮއިންޓު ލިބިފައިވާއިރު، ތިންވަނައިގައި އޮތް އެސްޓަން ވިލާއަށް ވެސް ލިބިފައިވަނީ 38 ޕޮއިންޓެވެ. ލިވަޕޫލް ކުރީގައި އޮތީ ފައިދާ ގޯލުންނެވެ.

މި ހަފްތާގެ މެޗުގައި އެސްޓަން ވިލާއިން ބަލިކުރީ ބްރެންޓްފޯޑެވެ. ފުރަތަމަ ހާފުގައި ބްރެންޓްފޯޑުން ލީޑު ނަގާފައި ވަނިކޮށް، ވިލާއިން މެޗު އަނބުރާލީ މެޗު ނިމެން ކައިރިވެފައި ވަނިކޮށެވެ. އެގޮތުން، މެޗު އެއްވަރު ކޮށްދިން ގޯލު އެލެކްސް މޮރޭނޯ ކާމިޔާބުކޮށްދިނީ 77 ވަނަ މިނެޓުގައެވެ. އަދި އެ ޓީމު މޮޅުކޮށްދިނީ 85 ވަނަ މިނެޓުގައި އޮލީ ވޮޓްކިންސް ކާމިޔާބުކުރި ގޯލަކުންނެވެ.

މި ނަތީޖާއާ އެކީ އުނާއި އެމްރޭގެ އެސްޓަން ވިލާ މިވަނީ މި އަހަރު 25 މެޗުން މޮޅުވެފައެވެ. މިއީ އިނގިރޭސި ފުރަތަމަ ލީގުގައި އެ ކްލަބުގެ ރެކޯޑެކެވެ.