ރާއްޖެއަށް ލިބޭ ހައްޖުކޯޓާ ހަމައެކަނި ހައްޖު ކޯޕަރޭޝަނަށް ދިނުމަށް ވަޒީރުންގެ މަޖިލީހުގެ ލަފާފުޅާއިއެކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު ނިންމަވައިފިއެވެ.

ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޝަހީބު ވިދާޅުވީ ސަރުކާރުން އެގޮތަށް ހަމަޖެއްސެވީ، ހައްޖުވެރިންގެ ހައްޖަށް ދިޔުމަށް ކުރަންޖެހޭ އިންތިޒާރު ދިގުލައިގެން ދިޔަ ނުދިނުމަށްކަމަށެވެ. އަދި އެކަމުގެ ސަބަބުން އާއްމުންނަށް ލުއިފަސޭހަތަކެއް ވެގެންދާނެކަމުގައިވެސް ޝަހީބު ވިދާޅުވިއެވެ.

ސަރުކާރުން މިނިންމުން ނިންމާފައި މިވަނީ، ސަރުކާރުންދޭ ހައްޖުކޯޓާގައި އަމިއްލަ ކުންފުނިތަކުން ސަރުކާރުން ކަނޑައަޅާފައިވާ އަގަށްވުރެ މާބޮޑު އަގެއް ނަގައިގެން މީހުން ހައްޖަށް ގެންދިޔުމުގެ މައްސަލަވެސް ބޮޑުވެފައި ވަނިކޮށެވެ.

ސަޢޫދީ ސަރުކާރުން ކޮންމެ އަހަރަކުވެސް ރާއްޖެއަށް ރަސްމީ ގޮތުން ދެމުން އަންނަނީ 1000 ކޯޓާއެވެ. އޭގެ އިތުރުންވެސް ބައެއް އަހަރުތަކުގައި އިތުރުކޯޓާ ދީފައިވެއެވެ.

މިދިޔަ އަހަރު ސަޢޫދީ ސަރުކާރުން ރާއްޖެއަށް ދިން 1000 ކޯޓާގެ ތެރެއިން އަމިއްލަ ކުންފުނިތަކަށް ސަރުކާރުން 270 ކޯޓާ ދިނެވެ.