އަވަހާރަވި ކުވައިތުގެ އަމީރުގެ މައްޗަށް އިސްލާމީ މަރުކަޒުގައި ޣައިބަށް ކަށުނަމާދު ކުރުމަށް ސަރުކާރުން ނިންމައިފިއެވެ.

މިނިސްޓްރީ އޮފް އިސްލާމިކް އެފެއާޒްއިން ހާމަކުރައްވާފައިވާ ގޮތުގައި، އުމުރުފުޅުން 86 އަހަރުފުޅުގައި، މިއަދު އަވަހާރަވި ކުވެއިތުގެ އަމީރު އައްޝައިހު ނަވާފް އަލް އަހުމަދު އަލްޖާބިރު އައްސަބާހުގެމައްޗަށް ޣައިބަށް ކަށު ނަމާދުކުރުން އޮންނާނީ، އާދިއްތަ ދުވަހުގެ ރޭގެ ޢިޝާނަމާދަށް ފަހުގައި، މަސްޖިދުލް ސުލްޠާން މުޙައްމަދު ތަކުރުފާނުލް ޢައުޒަމްގައެވެ.

މިނިސްޓްރީ އޮފް އިސްލާމިކް އެފެއާޒުން ބުނެފައި ވަނީ، ކުވެއިތަކީ، ރާއްޖެއާ ނުހަނު ގާތް އަހުވަންތަ ގުޅުމެއް އޮންނަ ގައުމެއްކަމުގައިވާތީ އެޤައުމުގެ އަމީރު އަވަހާރަވުމާ ގުޅިގެން އެމަނިކުފާނު މައްޗަށް ޣައިބަށް ކަށުނަމާދު ކުރުމަށް ހަމަޖައްސާފައިވާ ކަމަށާ، ވީހާ ވެސް ގިނަ ބަޔަކު އެނަމާދުގައި ބައިވެރިވުން އެދޭ ކަމަށެވެ.

ކުވައިތުގެ އަމީރު އަވަހާރަވުމުގެ ހިތާމައިގައި ރައީސުލްޖުމްހޫރިއްޔާ ކުވައިތުގެ ސަރުކާރަށާއު ރައްޔިތުންނަށް ތަޢުޒިޔާގެ މެސެޖެއް ފޮނުއްވާފައި ވާއިރު، މިއަދުން ފެށިގެން ތިން ދުވަސްވާންދެން ދިވެހި ޤައުމީ ދިދަ ބައިދަނޑިއަށް ތިރިކޮށްފައި ބެހެއްޓުމަށްވެސް ސަރުކާރުން ވަނީ ނިންމަވާފައެވެ.