2 ރަށެއްގައި މިސްކިތް ބިނާކުރުމަށް އިސްލާމީ ކަންތައްތަކާ ބެހޭ ވުޒާރާއިން ބަޔަކާ ހަވާލުކުރައްވައިފިއެވެ. މިސްކިތް ބިނާކުރުމަށް ހަވާލުކޮށްފައިވަނީ ބ. ދަރަވަންދޫއާއި ދ. ހުޅުދެލީގައެވެ. 

މި ދެ މިސްކިތުގެ މަސައްކަތް ޙަވާލުކުރައްވާފައިވަނީ، އެލައިޓް އިންޓަރނޭޝަނަލް ޕްރައިވެޓް ލިމިޓެޑާއެވެ. އެއްބަސްވުމުގައި ސޮއިކުރެއްވުމަށް ބޭއްވެވި ރަސްމިއްޔާތުގައި އިސްލާމީކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ، ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ.

ސަރުކާރުގެ ޕީއެސްއައިޕީ ބަޖެޓުން ޚަރަދުކުރައްވައިގެން ބިނާ ކުރާ މި 2 މިސްކިތަކީވެސް 300 މީހުންގެ ޖާގައިގެ މިސްކިތްކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެއެވެ. 

މި މިސްކިތްތަކަކީ ފިރިހެނުން އަދި އަންހެނުންނަށްވެސް ނަމާދުކުރުމަށް ޚާއްސަ ޖާގައާއެކު ފަރުމާކޮށްފައިވާ ދެ މިސްކިތެވެ. މި 2 މިސްކިތް ޢިމާރާތްކުރުމަށް ޙަވާލުކުރައްވާފައިވަނީ ކޮންމެ މިސްކިތެއް 9.7 މިލިއަން ރުފިޔާއަށެވެ.