އެންދިރުވުމާއި ގުޅޭ ޕްރޮގްރާމެއް ކުރިޔަށްގެންދަން ފަށާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިއްޔެ ފާހަގަކުރި ދިވެހިރާއްޖޭގެ މަސްވެރިންގެ ދުވަހުގެ މުނާޞަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، އެން ދިރުވައި، ގިނަ ވަގުތު ވަތުގައި ބެހެއްޓޭނެ ގޮތް ހެދުމާއި، އެން އިސްރާފު ކުރެވޭ މިންވަރު މަދުކުރުމަށް ތަފާތު ޕްރޮގްރާމްތަކެއް މިހާރު ވަނީ ފަށާފައި ކަމަށެވެ. އޭގެތެރޭގައި، ބޭރުގެ ހިލޭ އެހީގެ ދަށުން އައްޑުއަތޮޅުގެ ދޯންޏެއްގައި އެންވަތް ބަދަލުކޮށް، ގިނަ ވަގުތު އެން ބެހެއްޓޭތޯ ބެލުމުގެ ދިރާސާ މަސައްކަތް މިހާރު ވަނީ ފަށާފައި ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، މި ޒަމާނަށް ބަލާއިރު، އެންވެރިކަމުގެ މަސައްކަތަކީވެސް ވަރަށް ބޮޑަށް ތަރައްޤީކުރަން ޖެހިފައިވާ ދާއިރާއެއް ކަމަށް ދެކެވަޑައިގަންނަވާ ކަމަށެވެ. އަދި އެމަނިކުފާނު ބޭނުންފުޅުވަނީ، އެންވެރިކަމުގެ މަސައްކަތާއި، ޒަމާނީ ފަންނިއްޔާތު ނުވަތަ ޓެކްނޯލޮޖީއާ ގުޅުވާލައިގެން ޢިލްމީ އަސާސެއްގެ މައްޗަށް ދިވެހި އެންވެރިކަން އާލާކުރުމުގެ މަސައްކަތް ބިނާކުރަންކަމަށެވެ.

ރާއްޖޭގައި ކުރެވޭ ދޮށީގެ މަސްވެރިކަމަކީ، އެންވެރިކަމުގެ މައްޗަށް ބަރޯސާވެފައިވާ މަސްވެރިކަމެކެވެ. އެންވެރިކަން ނެތެމުން ދިޔުމުގެ ސަބަބުތަކުގެ ތެރޭގައި، އުމުރާނީ ތަރައްޤީއަށް ހިންގޭ މަޝްރޫޢުތަކުގެ ސަބަބުން ބިންހިއްކުމާއި ފަޅުފުންކުރުން ފަދަ މަޝްރޫޢުތަކުގެ ސަބަބުން ފަރުފަރާއި ހާހަަލަށް އަދި ގިރިތަކަށް ލިބޭ އިއާދަ ނުކުރެވޭ ގެއްލުންތައް ހިމެނެއެވެ.