އިންގްލިޝް ޕްރިމިއަރ ލީގުގައި ހޮނިހިރު ދުވަހުގެރޭ އިރާކޮޅު ލިވަޕޫލް އާއި ކްރިސްޓަލް ޕެލެސް ބައްދަލުކުރި މެޗުގެ ފަހު ވަގުތުގައި ހާވޭ އެލިއަޓް ކާމިޔާބުކުރި ގޯލަކުން، 2-1 އިން ލިވަޕޫލް މޮޅުވެ އެ ޓީމު ލީގުގެ އެއްވަނައަށް އެރިއެވެ. އެއީ އާސެނަލްއަށް ވުރެން އެއް ޕޮއިންޓު އިތުރަށް ހޯދައިގެންނެވެ. އަދި ހަފްތާ ނިމޭއިރު ވެސް ލިވަޕޫލް އެ މަގާމުގައި އޮންނާނެކަން ކަށަވަރުވީ، އާސެނަލް އާއި އެސްޓަން ވިލާ ބައްދަލުކުރި މެޗު، 1-0 އިން އެސްޓަން ވިލާ ކާމިޔާބު ކުރުމުންނެވެ.

ލިވަޕޫލް އާއި އެސްޓަން ވިލާ ބައްދަލުކުރި މެޗުގެ 76 ވަނަ މިނެޓުގައި މުޙައްމަދު ސަލާޙް ކާމިޔާބުކޮށްދިން ގޯލަކީ، ލިވަޕޫލުގެ ޖާޒީގައި އޭނާ ކާމިޔާބުކޮށްދިން 200 ވަނަ ގޯލެވެ. އެހެންކަމުން ސަލާހް ވެގެންގޮސްފައި މިވަނީ އިއާން ރަޝް، ރޮޖަރ ހަންޓް، ގޯޑަން ހޮޑްސަން އަދި ބިލީ ލިޑެލްއަށްފަހު މިހާ ގިނަ ގޯލު ލިވަޕޫލަށް ކާމިޔާބު ކޮށްދިން 5 ވަނަ ކުޅުންތެރިޔާއަށެވެ.

ކްރިސްޓަލް ޕެލެސް ބަލިކުރި ގޯލަކީ، ޕެނަލްޓީ އޭރިއާގެ ރޮނގު ކައިރިން ހާވޭ އެލިއަޓް ކާމިޔާބުކޮށްދިން ގޯލެކެވެ. ލިވަޕޫލުން އަސެނަލް ފަހަތަށް ޖައްސާލީ އެލިއަޓްގެ މި ގޯލުންނެވެ.

ކްރިސްޓަލް ޕެލެސްގެ ގޯލު ކާމިޔާބުކޮށްދިނީ، އެ ޓީމަށް ލިބުނު ޕެނަލްޓީއަކުން ދެވަނަ ހާފުގައި ކުޅެން ނިކުތް ޖީން ފިލިޕް މަޓޭޓާއެވެ. އެއީ މެޗުގެ 57 ވަނަ މިނެޓުގައެވެ. އެ ޓީމަށް ފުރަތަމަ ހާފުގައި ވެސް ޕެނަލްޓީއެއް ލިބުނެވެ. ނަމަވެސް، އެ ޕެނަލްޓީ ދޭން ނިންމި ނިންމުން އިތުރަށް ބަލަންޖެހޭކަމަށް ވީޑިއޯ އެސްސްޓެންޓް ރެފްރީ އެންގުމުން، މެޗުގެ ރެފްރީ އެންޑީ މެޑްލީ ވަނީ ވީޑިއޯ އަލުން ބެލުމަށްފަހު އެއީ ޕެނަލްޓީއެއް ނޫންކަމަށް ނިންމާފައެވެ. ރެފްރީ ނިންމީ، ޕެނަލްޓީ އޭރިއާ ތެރެއަށް ބޯޅަ ކުޅުމުގެ ކުރިން، ކްރިސްޓަކް ޕެލެސްގެ ކުޅުންތެރިޔާ ލިވަޕޫލްގެ ކުޅުންތެރިޔާއަށް ފައުލްކޮށްފައިވާކަމަށެވެ.

ލިވަޕޫލުން މި ސީޒަނުގައި ކާމިޔާބުކޮށްފައިވާ ގޯލުތަކުގެ ތެރެއިން 14 ގޯލަކީ މެޗުގެ ފަހު 15 މިނެޓުގައި ކާމިޔާބުކޮށްފައިވާ ގޯލުތަކެވެ. އަދި ލީޑު ގެއްލިފައިވަނިކޮށް ފަހަތުން އަރާ ކާމިޔާބުކުރި މެޗުތައް މި ސީޒަނުގައި ގިނައެވެ.