43 ވަނަ މަސްވެރިންގެ ދުވަހުގެ ހަރަކާތްތަކުގެ ތެރެއިން ބާއްވާ މަސްވެރިންގެ ގުންޒަރު މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް އިފުތިތާހުކޮށްދެއްވައިފިއެވެ. މި ގުންޒަރު ކުރިއަށްދަނީ މީރުމާގައެވެ. 

މި ގުންޒަރު ކުރިއަށްދާނީ މިއަދު ހެނދުނު 09:00 އިން ހަވީރު 17:00 ގެ ނިޔަލަށެވެ. މި ގުންޒަރުގައި ރާއްޖޭގެ އެކި ސަރަހައްދުތަކުން 40 މަސްވެރިން ވަނީ ބައިވެރިވެފައެވެ. އަދި އެކި އެކި މަސްވެރިކަމުގެ ސިނާއަތުގައި ހަރަކާތްތެރިވަމުންދާ ފަރާތްތައްވެސް މި ގުންޒަރުގައި ވަނީ ބައިވެރިވެފައެވެ.

މި ގުންޒަރުގައި މަސްވެރިންނާއި މަސްވެރިކަމާއި ގުޅޭ ތަފާތު އެކި ދާއިރާތަކާއި ބެހޭގޮތުން މަޝްވަރާކުރެވިގެން ދާނެއެވެ. އޭގެތެރޭގަ ކަޅުބިލަމަހުގެ މަސްވެރިކަމާއި، އެމް.އެސް.ސީ ސެޓިފިކެޓް ދެމެހެއްޓުމަށް ކުރަންޖެހޭ ކަންތައްތަކާއި، ބޮޑުކަންނެލީގެ މަސްވެރިކަން ދެމެހެއްޓުމައްޓަކައި ހިންގަމުންދާ މަސައްކަތްތަކާއި ބެހޭ ގޮތުން މަޝްވަރާކުރާނެކަމަށް މިނިސްޓްރީން ވިދާޅުވެއެވެ.

އަދި މަސްދޯނިފަހަރުގައި ރެސްކިއު ޑައިވިނައް ސެޓިފައިވެފައިވާ ފަޅުވެރިން ތިބުމުގެ މުހިންމު ކަމާއި، ކަނދުފަތި ގާއިމްކުރުމުގައި ބަލަންޖެހޭ ބައެއް ފަންނީ ކަންކަމަށްވެސް އަލިއަޅުވާލެވޭނެއެވެ.

މީގެ އިތުރުން މަސްވެރިޔާ ކާޑުގެ މައުލޫމާތު އަދި ސްކޭމް އާއި ފްރޯޑްއަށްމަށް މައުލޫމާތު ރައްކާތެރިވުމަށް ހޭލުންތެރިކުރު ދިނުމަށްވެސް ވަނީ ހަމަޖެހިފައެވެ. އަދި ހަމައެއާއެކު މަހުގެ އަގު ކަނޑައެޅުމުގައި އަމިއްލަ ކުންފުނިތަކުގެ ފަރާތުން ގެންގުޅޭ ހަމަތަކާއި މިންގަނޑުތަކާއި ގުޅޭގޮތުން މައުލޫމާތު ހިއްސާކުރުމަށްވެސް ހަމަޖެހިފައިވާކަމަށް މިނިސްޓްރީން ވަނީ ވިދާޅުވެފައެވެ.

މަސްވެރިކަމުގެ ސިނާއަތުގައި ހުރި ކަންބޮޑުވުންތައް ހިއްސާކޮށް އެކަންކަން ހައްލުކުރުމަށް ކުރެވިދާނެ ކަންތައްތަކާ މި ގުންޒަރު ނިންމާލުގެ ގޮތުން މަސްވެރިންގެ ހިޔާލު ހޯދާނެއެވެ.