މާލެ ސިޓީން ފެންކެނޑި މާލެ ފެނަށް ޖެހުނުތާ 9 އަހަރު ފުރުނު އިރު މިއަދު އައްޑޫ ސިޓީގެ ގުޅިފައި ރަށްތަކުން ފެން ކެނޑި އާއްމު ރައްޔިތުން ފެނަށް ޖެހިއްޖެއެވެ.

އައްޑޫ ސިޓީ ކައުންސިލުން ވިދާޅުވި ގޮތުގައި، އައްޑޫ ސިޓީގެ ގުޅިފައިވާ ރަށްތަކުން ފެނުގެ ޚިދުމަތް މެދު ކެނޑިފައި ވަނީ މިއަދު މެންދުރުން ފެށިގެންނެވެ. އަދި އަލުން ފެނުގެ ޚިދުމަތް ލިބޭނޭ އިރެއް ނޭނގޭ ކަމުގައި އައްޑޫ ސިޓީ ކައުންސިލުން ވަނީ ވިދާޅުވެފައެވެ.

އައްޑޫ ސިޓީގައި ފެނުގެ ޚިދުމަތް ފޯރުކޮށްދެމުން އަންނަނީ އެސިޓީގައި، ކަރަންޓްގެ ޚިދުމަތްވެސް ފޯރުކޮށްދެމުން އަންނަ ފެނަކަ ކޯޕަރޭޝަނުންނެވެ. ފެނުގެ ޚިދުމަތް މެދުކެނޑުނު ހާދިސާއާ ގުޅޭ ގޮތުން ފެނަކަ ކޯޕަރޭޝަނުން އެއްޗެއް ނުބުނެއެވެ.

Advertisement

އެހެން ނަމަވެސް އައްޑޫ ސިޓީ ކައުންސިލުން ހާމަކޮށްފައިވާ ގޮތުގައި ފެނުގެ ޚިދުމަތް މެދުކެނޑިގެން އުޅެނީ ފެން ފޯރުކޮށްދިނުމަށް ބޭނުން ކުރާ ޕަމްޕްތަކަށް ދިމާވެގެން އުޅޭ މައްސަލައަކުންނެވެ.

2014 ވަނަ އަހަރުގެ ޑިސެމްބަރު 04 ވަނަ ދުވަހު މުޅި މާލެއިން ފެންކެނޑުމާއި އެކު އާއްމުންނަށް ބޮޑެތި ދަތިތަކާއި ކުރިމަތިވިއެވެ. އަދި އިިންޑިއާ، ޗައިނާ ސަރުކާރުން އެޤައުމުތަކުގެ އަސްކަރީ މަތިންދާ ބޯޓު ފަހަރުގައި މާލެއަށް އެފަހަރު ފެން ގެނެސްދިނެވެ. މާލޭގެ ފެނުގެ މައްސަލަ ހައްލުވާ ހަފްތާއަކަށް ވުރެ ގިނަ ދުވަސް ހޭދަވެގެން ދިޔައެވެ.