މިސަރުކާރުގެ ފުރަތަމަ ދެ ހަފްތާ ނިމިގެން ދިޔައިރު އަދިވެސް، ރާއްޖޭގައި ތިބި އިންޑިއާ ސިފައިންގެ ސާފު ސައްޙަ އަދަދެއް ސަރުކާރަށް ނޭނގޭކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ބޭއްވި ވަޒީރުންގެ މަޖިލީހުގެ ޖަލްސާގައި ނިންމި ނިންމުތަކާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބު ދެއްވަމުންނެވެ.

ރައީސުލްޖުމްހޫރިއްޔާ ވިދާޅުވީ، އިންޑިއާ ސިފައިން ރާއްޖޭގައި ތިބި އަދަދާއި ގުޅޭ ގޮތުން ސަރުކާރުގެ އެކި އިދާރާތަކުގައި ހުރި މައުލޫމާތުތައް ދިމާ ނުވާ ކަމަށެވެ. އަދި ސަރުކާރުގެ އިދާރާތަކުގައި ހުރި މައުލޫމާތަށް ބަލާއިރު، ރާއްޖޭގައި ތިބީ 77 ނުވަތަ 89 އިންޑިއާ ސިފައިންކަމަށާއި އެހެންނަމަވެސް އެއަދަދު އެއަށް ވުރެވެސް އިތުރުވެދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމާއި ގުޅޭ ގޮތުން ޑިފެންސް މިނިސްޓްރީއާ ފޮރިން މިނިސްޓްރީ އަދި އިންޑިއާ އެމްބަސީ ގުޅިގެން އުފައްދާފައިވާ ކޮމިޓީން މަސައްކަތްތަކެއް ކުރައްވަމުން ގެންދާ ކަމަށެވެ.

ކޮޕް-28ގެ ހަވާސާގެ ތެރެއިން އިންޑިއާގެ ބޮޑުވަޒީރު ނަރެންދުރަ މޯދީއާ ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި އިންޑިއާ ސިފައިންގެ މައްސަލައިގައި އެއްވެސް މަޝްވަރާއެއް ކުރެވުނުތޯ ނޫސްވެރިން ދެންނެވި ސުވާލަށް ސީދާ ޖަވާބެއް ރައީސް ނުދެއްވިއެވެ. އެހެން ނަމަވެސް އެމަނިކުފާނު ވިދާޅުވީ، އިންޑިއާއަށް ދިވެހިންގެ ނިންމުން ސާފުކަމަށާއި، ދިވެހިންގެ ނިންމުމަށާއި އިންޑިއާކަނޑުގެ ސަލާމަތާއި ރައްކާތެރިކަމަށް އިންޑިއާއިން އިޙްތިރާމް ކުރައްވާނެކަން އިންޑިއާގެ ބޮޑުވަޒީރު ހާމަކުރެއްވި ކަމަށެވެ.

ރާއްޖެއިން އިންޑިއާ ސިފައިން ފޮނުއްވާ ލެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. ބައެއް މަސްދަރުތަކުން ހާމަކޮށްފައިވާ ގޮތުގައި އިންޑިއާ ސިފައިން ރާއްޖޭގައި ޔުނީފޯމް ނާޅާ ބައެއްގެ ގޮތުގައި ބޭތިއްބުމާއި މެދު ދެސަރުކާރުގެ ދެމެދުގައި އުފައްދާފައިވާ ކޮމިޓީގައި ދަނީ މަޝްވަރާކުރަމުންނެވެ. އެހެން ނަމަވެސް އެކަމާއިގުޅޭ ގޮތުން ރަސްމީ ސިފައެއްގައި ސަރުކާރުން އެއްވެސް އެއްޗެއް ބުނެފައެއް ނުވެއެވެ.