އައްޑޫ ސިޓީގައި މިއަދު އަނެއްކާވެސް ދެ ގުރޫޕެއްގެ ދެމެދުގައި މާރާމާރީ ހިންގައި އުމުރުން 20 އަހަރުގެ ޒުވާނަކު ޒަޚަމްކޮށްލައިފިއެވެ.

ފުލުހުންގެ އިދާރާއިން ވިދާޅުވީ، މާރާމާރީ ހިނގައިގެން އުޅޭކަން ރިޕޯޓްކޮށްފައި ވަނީ މިއަދުގެ މެންދުރުފަހު، 15:30 ހާއިރު އައްޑޫ ސިޓީ ހިތަދޫއިންނެވެ. ފުލުހުން ވިދާޅުވީ، ތޫނުއެއްޗަކުން ހަމަލާދީ ޒަޚަމްކޮށްލުމުގެ ސަބަބުން އެޒުވާނާއަށް ފަރުވާދެމުން ދަނީ އައްޑޫ ސިޓީ ހިތަދޫގައި ހުންނަ އިކުއެޓޯރިއަލް ހޮސްޕިޓަލްގައި ކަމަށެވެ.

މިމާރާމާރީގެ މައްސަލަވެސް ތަޙްޤީޤުކުރަމުންދާ ކަމުގައި ފުލުހުން ވަނީ ބުނެފައެވެ.

އައްޑޫ ސިޓީ ހިތަދޫގައި، ޑިސެމްބަރު މަހުގެ 1 ވަނަ ދުވަހުގެރޭ ވެސް ވަނީ ދެގުރޫޕެއްގެ ދެމެދުގައި މާރާމާރީއެއް ހިންގައި، ޒުވާނަކު ވަރަށް ބޮޑަށް ޒަޚަމްކޮށްލާފައެވެ. ޒަޚަމްކޮށްލާފައިވާ ޒުވާނާގެ ހާލު ސީރިޔަސްކަމުގައި ފުލުހުން ވިދާޅުވެއެވެ. މީގެ އިތުރުން އައްޑޫ ސިޓީގައި ގުރޫޕް މާރާމާރީތައް އިތުރުވެގެން ދިޔުމާއި ގުޅިގެން ސަލާމަތީ ފިޔަވަޅުތައް ވަރުގަދަކޮށް އިތުރު ފުލުހުން ފޮނުވާފައިވާ ކަމުގައިވެސް ފުލުހުން ވަނީ ވިދާޅުވެފައެވެ.

ޑިސެމްބަރު މަހުގެ 1 ވަނަ ދުވަހުގެރޭ ހިނގި މާރާމާރިއާ ގުޅިގެން ފުލުހުން މިއަދު ވަނީ އައްޑޫ ސިޓީ ހިތަދޫއިން ވަނީ ހަތަރު މީހަކު ހައްޔަރުކޮށްފައެވެ. ފުލުހުން ހާމަކުރައްވާފައިވާ ގޮތުގައި ހައްޔަރުކުރި މީހުންގެ ތެރޭގައި ހިމެނެނީ އުމުރުން 18 އަހަރުގެ މީހަކާއި 19 އަހަރުގެ މީހަކާއި، 20 އަހަރުގެ މީހެއްގެ އިތުރުން 23 އަހަރުގެ މީހެކެވެ. މިއެންމެންނަކީވެސް ދިވެހި ފިރިހެނުންކަމުގައި ފުލުހުންގެ އިދާރާއިން ވަނީ ވިދާޅުވެފައެވެ.