މިހާރު ކުރިޔަށްދާ ކޮޕް-28 ސަމިޓްގެ ހަވާސާގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އިންޑިއާގެ އެންމެ ބޮޑު ބިލިޔަނަރު މުކޭޝް އަމްބާނީއާ ބައްދަލުވެވަޑައިގެންފިއެވެ.

މުކޭޝް އަމްބާނީއާ ސަމިޓް ބާއްވާ ތަނުގެ ސައިކޮޓަރިކޮޅުން ބައްދަލުވެވަޑައިގަތުމުން ރައީސުލްޖުމްހޫރިއްޔާވަނީ، މުކޭޝް އަމްބާނީއާ ވާހަކަފުޅު ދައްކަވާފައި ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވެއެވެ.

މުކޭޝް އަމްބާނީއަކީ، އިންޑިއާއާ އިންޑިއާއިން ބޭރުގައި ބޮޑެތި ވިޔަފާރިތައް ހިންގާ ބޭފުޅެކެވެ. މިގޮތުން މުވާސަލާތާއި، ތެލާއި ހަކަތަ އަދި ވިޔަފާރު ބަނދަރުތައް ހިންގުމުގެ ވިޔަފާރިތައް ކުރާއިރު އޭނާގެ މިލްކިއްޔާތުގެ އަގު ގާތްގަނޑަކަށް 92 ބިލިއަން ޑޮލަރަށް އަރައެެވެ.

ކޮޕް-28 ސަމިޓަށް ރައީސުލްޖުމްހޫރިއްޔާ، ޔޫއޭއީއަށް ވަޑައިގެން އުޅުއްވާއިރު، އެތަނުން ދުނިޔޭގެ ޤައުމުތަކުގެ ގިނަ ވެރިންނާއި އެމަނިކުފާނާއި ދިމާވެފައިވެއެެވެ. އޭގެ ތެރޭގައި، އިނގިރޭސި ރަސްގެފާނު ޗާލްސް 3 ވަނަ އާއި، އުރުދުންގެ ރަސްގެފާނެ އަބްދުﷲ އާއި ބުރޫނާއީ ދާރުއްސަލާމްގެ ރަސްގެފާނު ހަސަނުލް ބުލްޤިއާ އާއި ގަތަރުގެ އަމީރު ތަމީމް ބިން ހަމަދު ބިން ޘާނީ ހިމެނިވަޑައިގަންނަވައެވެ.

ކޮޕް-28ގެ ހަވާސާގެ ތެރެއިން، ރައީސުލްޖުމްހޫރިއްޔާ ޑރ. މުޢިއްޒުއާ ދިމާވާ ބޭފުޅުންނާއި ސަލާމްކުރައްވައި ނުވަތަ ވާހަކަފުޅު ދައްކަވަން ހުންނަވަނިކޮށް ނަގާފައިވާ ފޮޓޯ ފުޅުތައް، ޕޯސްޓްކޮށް އެއީ ރަސްމީ ބައްދަލު ކުރެއްވުމުގެ ގޮތުގައި ޕޯސްޓްކުރަމުންދާތީ، އެކަމަށް ބައެއް ފަރާތްތަކުގެ ފާޑު ކިޔުންތައް ވަނީ އަމާޒުވެފައެވެ.