ޔޫއޭއީގައި މިހާރު ކުރިޔަށްދާ، ކޮޕް-28 ސަމިޓްގެ ހަވާސާގެ ތެރެއިން ރައީސުލްޖުމްހޫރިއްޔާ ޑރ، މުޙައްމަދު މުޢިއްޒު އިންޑިއާގެ ބޮޑުވަޒީރާއި ބައްދަލުކުރައްވައިފިއެވެ.

މިބައްދަލުކުރެއްވުމާއި ގުޅޭ ގޮތުން، ރައީސުލްޖުމްހޫރިއްޔާގެ އޮފީހުންނާއި، އިންޑިއާގެ އެކްސްޓަރނަލް އެފެއާޒްއން ވަނީ މައުލޫމާތު ހާމަކޮށްފައެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ކޮޕް-28ގެ ހަވާސާގައި، ދެބޭފުޅުން ބޭއްވެވި މިބައްދަލު ކުރެއްވުމުގައި ދެޤައުމުގެ ގުޅުން ބަދަހިކުރެއްވުމާއި ގުޅޭ ގޮތުން މަޝްވަރާކުރެއްވި ކަމަށެވެ. އިންޑިއާ ސަރުކާރުން ހާމަކޮށްފައިވާ ގޮތުގައި މިބައްދަލުވުމުގައި ދެބޭފުޅުން ވަނީ، އިންޑިއާއާ ރާއްޖޭގެ ގުޅުން ބަދަހިކުރުމަށް ކޮމިޓީއެއް އުފެއްދެވުމާއި، އަދި ދެޤައުމުގެ ދެމެދުގައި ވައިގެ ދަތުރުފަތުރުފުޅާ ކުރުމާއި ގުޅޭ ގޮތުން ވާހަކަފުޅު ދައްކަވާފައެވެ.

މިބައްދަލުވުން ކަވަރުކުރި، އިންޑިއާގެ ޤައުމީޓީވީގެ ނޫސްވެރިޔާ ރިޕޯޓްކޮށްފައިވާ ގޮތުގައި، ރާއްޖޭގައި ތިބި އިންޑިއާ ސިފައިން ބޭލުމާއި ގުޅޭ އެއްވެސް ވާހަކައެއް މިބައްދަލުވުމުގައި ނުދެކެވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތަށް މޯދީ ވަޑައިނުގަންނަވައި ފޮނުއްވެވީ ކެބިނެޓް ވަޒީރެކެވެ.

ޑރ. މުޙައްމަދު މުޢިއްޒުގެ ރިޔާސީ ކެމްޕޭނުގެ މައިގަނޑު އެއްވަޢުދަކީ، ދިވެހިރާއްޖޭގައި ތިބި އިންޑިއާ ސިފައިން ބޭލުމެވެ. އަދި ޕީޕީއެމްއިން ހިންގި އިންޑިއާއައުޓް ކެމްޕޭންތަކާއި އެއްވުންތަކުގައިވެސް ޑރ. މުޢިއްޒު ޢަމަލީ ގޮތުން ބައިވެރިވެވަޑައިގެންނެވިއެވެ.