ސަރުކާރު ހިންގާ ޕާޓީ. ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ސެކެޓްރީ ޖެނެރަލްގެ މަގާމުގައި ހުންނެވި ޝިފާޤު މުފީދު އެޕާޓީން ވަކިވެވަޑައިގެން ރައީސް ޔާމީން އަލަށް އުފައްދަވާ ޕާޓީ، ޕާޓީ ޕީޕަލްސް ނޭޝަނަލް ފްރޮންޓު (ޕީއެންއެފް)އާ ގުޅިވަޑައިގެންނެވުމަށް ނިމަވައިފިއެވެ.

މިއީ ސަރުކާރު ހިންގާ ޕާޓީގެ ގޮތުގައި އޮތް ޕީއެންސީގެ އިސްމަޤާމެއްގައި ހުންނެވި ބޭފުޅުންގެ ތެރެއިން އެޕާޓީން ވަކިވެވަޑައިގަތް ފުރަތަމަ ބޭފުޅާއެވެ. ޕީއެސްސީން ވަކިވެވަޑައިގެން ޝިފާޤު އާއްމު ކުރެއްވި ސިޓީގައި ވިދާޅުވީ، ޕީއެންސީ މިއަދު އެހިނގާ މަގަކީ ދިވެހީންގެ ރާއްޖޭ ދިވެހީން އެދޭ މަގަށް ގެންދެވޭނެ ގޮތެއް ކަމަށް ނުފެންނާތީ ޕާޓީން އިސްތިއުފާ ދެއްވާފައިވާ ކަމަށެވެ.

ޝިފާޤުގެ އިސްތިއުފާގައި ނުސީދާކޮށް، އަބުދުއްރަޙީމަށް ވަނީ ފާޑު ވިދާޅުވެފައެވެ.

ޝިފާޤަކީ، ރައްޔިތުން މަޖިލީހުގެ ފުވައްމުލަކު މެދު ދާއިރާގެ މެންބަރުގެ މަޤާމުވެސް ފުރުއްވި، އަދި ޕީޕީއެމްއާ ޖުމްހޫރީޕާޓީގައި އިސްކޮށް މަސައްކަތް ކުރައްވާފައިވާ ބޭފުޅެކެވެ.

ޝިފާޤު އިސްތިއުފާ މިދެއްވީ، ޕީޕީއެމް ޕީއެންސީގެ ޓިކެޓުގައި ރައްޔިތުންގެ މަޖިލީހުގެ އިންތިޚާބަށް ވާދަކުރެއްވުމުގެ ޝައުޤުވެރިކަންވެސް ފާޅުކުރައްވާފައި ވަނިކޮށެވެ.