މަންޓާ އެއަރއިން އިންޑިއާގެ ބެންގަލޫރަށް ސީދާ ދަތުރުތައް ފެށުމަށް ތައްޔާރުވެއްޖެއެވެ. މިއީ މަންޓާ އެއަރއިން ބައިނަލްއަޤްވާމީ ދަތުރުތައް ފަށާ ފުރަތަމަ ފަހަރެވެ.

މަންޓާ އެއަރއިން ބުނީ އަންނަ ޖަނަވަރީ މަހުން ފެށިގެން އިންޑިއާއަށް އެ އެއަރލައިންގެ ދަތުރުތައް ފެށުމަށް ހަމަޖެހިފައިވާކަމަށެވެ. މި ދަތުރުތައް ބާއްވަނީ ދާލު އެއަރޕޯޓުން ބެންގަލޫރު ކެންޕެގޯޑާ އިންޓަނޭޝަނަލް އެއަރޕޯޓަށެވެ. 

ދާލު އެއަރޕޯޓަކީ މަންޓާގެ މައި ހަބްގެ ގޮތުގައި ބޭނުންކުރާ އެއަރޕޯޓެވެ. އިންޑިއާއިން ސީދާ ދަތުރުތައް ދާލު އެއަރޕޯޓަށް ފެށުމުގެ ސަބަބުން އެ ސަރަހައްދަށާއި އެ ސަރަހައްދުގެ ރިސޯޓްތަކަށް ގިނަ ފައިދާތަކެއް ލިބިގެންދާނެކަމަށް މަންޓާ އެއަރއިން ވަނީ ބުނެފައެވެ.

މަންޓާއިން މިހާރު ޕްލޭންކޮށްފައިވަނީ ހަފްތާއަކު 3 ދަތުރު ބޭއްވުމަށެވެ. ބެންގަލޫރުން ރާއްޖެއަށް ދަތުރު ކުރަނީ ހެނދުނުއެވެ. އަދި ރާއްޖެއިން ބެންގަލޫރަށް ފުރުމަށް ހަމަޖެހިފައިވަނީ ރޭގަނޑުކަމަށް މަންޓާއިން ވަނީ ބުނެފައެވެ.

މަންޓާ އެއަރލައިން ރަސްމީކޮށް ލޯންޗްކޮށްފައިވަނީ 2018 ވަނަ އަހަރުގެ ނޮވެންބަރ މަހުގެ 22 ވަނަ ދުވަހުއެވެ. އަދި މި އެއަރލައިންގެ ދަތުރުތައް ރަސްމީކޮށް ފަށާފައިވަނީ 2019 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހުއެވެ.