މާލޭ ސިޓީގެ ކައުންސިލްގެ މޭޔަރުގެ ގޮނޑި ހިމެނޭހެން އެ ކައުންސިލުން ހުސްވެފައިވާ 4 ގޮނޑިއަށް އެމްޑީޕީގެ ފަރާތުން ކުރިމަތިލުމަށް ބޭނުންވާ ފަރާތްތަކަށް އެ ފުރުސަތު ހުޅުވާލާފައިފިއެވެ.

އެމްޑީޕީން ބުނީ މާލޭ ސިޓީ ކައުންސިލުން ހުސްވެފައިވާ އެ ގޮނޑިތަކަށް އެ ޕާޓީގެ ފަރާތުން ކުރިމަތިލުމަށް ޝައުގުވެރިކަން ހުރި ފަރާތްތަކުން ޑިސެމްބަރު މަހުގެ އެއްވަނަ ދުވަހުގެ ހަވީރު 4:00 ގެ ކުރިން ފޯމް ހުށަހަޅަންޖެހޭ ކަމަށެވެ. މާލޭ ސިޓީ ކައުންސިލްގެ ހުސްވެފައިވާ ގޮނޑިތަކަށް މެންބަރުން އިންތިހާބު ކުރުމަށް ބާއްވާ ބައި-އިލެކްޝަން އަންނަ ޖެނުއަރީ މަހު 13 ގައި ބޭއްވުމަށް އިލެކްޝަންސް ކޮމިޝަން (އީސީ) އިން މިހާރު ވަނީ ނިންމާފައެވެ.

މާލޭ މޭޔަރުކަމުގެ މަގާމު ހުސްވެފައި ވަނީ އެ މަގާމު އަދާ ކުރައްވަމުން ގެންދެވި، ޑރ. މުޙައްމަދު މުއިއްޒު، ރައީސުލްޖުމްހޫރިއްޔާ ކަމަށް ވަޑައިގަތުމުންނެވެ. މިހާރު ވަނީ މޭޔަރުގެ މަގާމާއެކު ޖުމުލަ ހަތަރު ގޮނޑިއެއް މާލޭ ސިޓީ ކައުންސިލުން ހުސްވެފަ އެވެ. 

މާލޭ ސިޓީ ކައުންސިލުން ހުސްވެފައި ވަނީ މާފަންނު ދެކުނު ދާއިރާ އާއި މެދު ހެންވޭރު ދާއިރާ އާއި އަދި ހެންވޭރު ދެކުނު ދާއިރާ އެވެ. މީގެ ތެރެއިން މާލޭގެ މޭޔަރު ކަމަކީ ވަކިން މުޅި މާލޭ ސިޓީން ވޯޓުލައިގެން އިންތިހާބު ކުރާ މަގާމެކެވެ.