ފަލަސްޠީނުގެ ރައްޔިތުންގެ ޙައްޤުތައް ހޯދައިދެއްވުމަށް ދިވެހި ސަރުކާރުން ކުރަމުންދާ މަސައްކަތްތަކަށް ބަދަލެއް ނުގެނެސް އެމަސައްކަތްތަކާއިއެކު ކުރިޔަށްދާނެ ކަމުގެ ޔަޤީންކަން ރައިސުލްޖުމްހޫރިއްޔާ ދެއްވައިފިއެވެ.

ރައީސުލްޖުމްހޫރިއްޔާ މިޔަޤިންކަން ދެއްވީ، ތުރުކީވިލާތުގެ ގްރޭންޑް ނޭޝަނަލް އެސެމްބްލީގެ ޗެއަރމަން އަދި ރައީސް، ޕްރޮފެސަރ ޑޮކްޓަރ ނޫމާން ކުރްތުލުމުސްއާ ބައްދަލު ކުރައްވައި އަދި ތުރުކީގެ ޕާލަމެންޓްގައި ދެއްކެވި ވާހަކަފުޅުގައެވެ.

މިގޮތުން ރައީސުލްޖުމްހޫރިއްޔާގެ ވާހަކަފުޅުގައި ވަނީ، ފަލަސްޠީނުގެ މިނިވަންކަމަށް ބައިނަލްއަޤުވާމީ މުޖުތަމައުގައި ވަކާލާތުކުރާ ކުރުމުގެ މައްޗަށްވެސް އަލިއަޅުއްވާލައްވާފައެވެ. ފަލަސްޠީނުގެ މިނިވަން ދައުލަތް ޤާއިމްކުރުމަށާއި، 1948ގައި ކަނޑައެޅި ބޯޑަރުތަކާއި ހަމައަށް އިޒްރޭލުން ފަހަތައް ޖެހުމަށާއި، ފަލަސްޠީނުގެ ސަރަހައްދުތަކުގައި އިޒްރޭލުން ބައިނަލްއަޤުވާމީ ޤާނޫނު ތަކާއި ޚިލާފަށް ޔަހޫދީ އާބާދީތައް ހަދަމުން ދިޔުން ދިވެހިރާއްޖެއިން އަބަދުވެސް އަންނަނީ ކުއްވެރިކުރަމުންނެވެ. އަދި ފަލަސްޠީނުގެ މައްސަލައަށް އޮތީ ދެދައުލަތުގެ ހައްލު ކަމަށާއި، ފަަލަސްޠީން މިނިވަންކޮށް ފަލަސްޠީނުގެ ވެރިރަށަކީ އިރުމަތީ ޤުދުސްކަމުގައި ހަމަޖެއްސުމަށްވެސް ރާއްޖެއިން އަންނަނީ ވަކާލާތު ކުރަމުންނެވެ.

ރައީސުލްޖުމްހޫރިއްޔާ މިބައްދަލުކުރެއްވުމުގައި ދެއްކެވި ވާހަކަފުޅުގައި، ރާއްޖެއަކީ ކުޑަކުޑަ އާބާދީއެއް އޮންނަ ޤައުމެއް ނަމަވެސް ގުދުރަތީ ގޮތުން އިންޑިއާ ކަނޑުގައި ރާއްޖެ އެތުރިފައި ވަނީ ބޮޑު ސަރަޙައްދެއްގެ މައްޗަށްކަން ފާހަގަކުރެއްވިއެވެ. އަދި ރާއްޖޭގެ ޚާއްޞަ އިޤްތިޞާދީ ސަރަހައްދަކީވެސް ބޮޑު ސަރަހައްދެއް ކަމަށާއި ގުދުރަތީ ގޮތުން ރާއްޖެ އޮންނަނީވެސް ސަރަހައްދީ މުހިންމު ހިސާބެއްގައިކަން އެމަނިކުފާނު ފާހަގަކުރެއްވިއެވެ.

މީގެ އިތުރުން، ރާއްޖޭގެ މިނިވަންކަމާއި އިސްތިޤްލާލު ހިމާޔަތްކުރުމުގެ މުހިންމުކަން ފާހަގަކުރައްވަމުން ރާއްޖެއާއި ދުރާއި ގާތުން އެކީގައި މަސައްކަތްކުރާ ހުރިހާ ބައިވެރިންނާއެކުވެސް އަބަދުވެސް އެއްކޮށް މަސައްކަތްކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. 

ފަލަސްޠީނުގެ ރައްޔިތުންގެ ހައްޤުތަކަށް ރާއްޖެއިން ކުރާ މަސައްކަތްތަކަށް ބަދަލެއް ނާންނާނެ ކަމުގައި ރައީސުލްޖުމްހޫރިއްޔާ ވިދާޅުވިއިރު، ވެރިކަމާާއި ހަވާލުވެވަޑައިގެން ހުވާކުރެއްވުމަށްފަހު ކުރެއްވި ފުރަތަމަ ތަޤުރީރުގައި އެއްގޮތަކަށްވެސް ފަލަސްޠީނުގެ މައްސަލައަށް އަލިއަޅުވާނުލުމުން އެކަމާއި މެދު ފާޑިޔުންތައް އަމާޒުވެގެން ދިޔައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތުރުކީ ވިލާތަށް މިމަހުގެ 26 ވަނަ ދުވަހު ފެއްޓެވި، ފުރަމާނަ ދަތުރުފުޅު ނިންމަވާލެއްވުމަށް ފަހުގައި މިއަދު އެޤައުމުން ފުރާ ވަޑައިގަންނަވާނެއެވެ.