ތުރުކީވިލާތާއި ދިވެހިރާއްޖެއިން ވިޔަފާރީގެ އެއްބަސްވުމެއްގައި ސޮއިކޮށްފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި މި އެއްބަސްވުމުގައި ސޮއެކުރައްވާފައި ވަނީ، މިހާރު ރައީސުލްޖުމްހޫރިއްޔާ ތުރުކީ ވިލާތަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން އިއްޔެ ދެޤައުމުގެ ވެރިންގެ މެދުގައި ބޭއްވި ރަސްމީ ވާހަކަފުޅު ތަކަށް ފަހުގައެވެ.

މިގޮތުން، އެގްރީމަންޓް އޮން ޓްރޭޑް އެންޑް އިކޮނޮމިކް ކޯޕަރޭޝަން ބިޓްވީން ދަ ގަވަރމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރމަންޓް އޮފް ދަ ރިޕަބްލިކް އޮފް ތުރްކިއޭ"ގެ ނަމުގައި ދެޤައުމުގެ ދެމެދުގައި ވެވުނު މިއެއްބަސްވުމުގައި ރާއްޖޭގެ ފަރާތުން ސޮއިކުރެއްވީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދެވެ. ތުރުކީވިލާތުގެ ފަރާތުން، ސޮއިކުރެއްވީ މިނިސްޓަރ އޮފް ޓްރޭޑް ޕްރޮފެސަރ ޑޮކްޓަރ އޮމަރ ބޮލަޓްއެވެ.

މިއެއްބަސްވުމަކީ، ދިވެހިރާއްޖެއާ ތުރުކީއާ ދެމެދު މިހާރު އޮތް ވިޔަފާރީގެ ގުޅުންތައް އިތުރަށް ބަދަހި ކުރުމާއި ގުޅޭ ގޮތުން ދެޤައުމުގެ ދެމެދުގައި ވެވުނު އެއްބަސް ވުމެކެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިމަހުގެ 26 ވަނަ ދުވަހު ތުރުކީވިލާތަށް ފެއްޓެވި ފުރަމާނަ ދަތުރުފުޅުގައި، އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވެރިންގެ ވަފުދެއް ބައިވެރިވެވަޑައިގަންނަވައެވެ.