ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތުރުކިޔޭއަށް ކުރައްވަމުން ގެންދަަވާ ރަސްމީ ދަތުރު ފުޅުގެ ތެރެއިން، އެޤައުމުގެ ރައީސް ރަޖަބް ޠައްޔިބް އުރްދުޣާންއާ، ބައްދަލުކުރައްވައިފިއެވެ.

މިބައްދަލު ކުރެއްވުން ކުރިޔަށް ދިޔައީ، ތުރުރުކީގެ ވެރިރަށް އަންކާރާގައި ހުންނަ، އުރްދުޣާންގެ ރިޔާސީ ގަނޑުވަރުގައެވެ.

މިބައްދަލުކުރެއްވުމުގެ ތެރެއިން، ދެބޭފުޅުންވަނީ ދިވެހިރާއްޖެއާ ތުރުކިޔޭއާ ދެމެދުގައި ރަސްމީ ވާހަކަފުޅުތައް ކުރިޔަށް ގެންދަވާފައެވެ. މިގޮތުން ދެޤައުމުގެ ވެރިންގެ މެދުގައި ބޭއްވުނު ރަސްމީ ވާހަކަފުޅުތަކުގައި، ދިވެހިރާއްޖެއާ ތުރުކިޔޭއާއި ދެމެދު މިހާރު އޮތް ގުޅުން އިތުރަށް ބަދަހި ކުރެއްވުމާއި، ވިޔަފާރީގެ ދާއިރާއާއި، އިންވެސްޓްމަންޓާއި، އިޢާދަކުރަނިވި ހަކަތައާއި، މަތީ ތަޢުލީމުގެ ދާއިރާއިން ގުޅުން ބަދަހިކުރެއްވުމާއި ގުޅޭ ގޮތުން ވަނީ މަޝްވަރާކުރައްވާފައެވެ.

އަދި މިބައްދަލުވުމުގައި ރައީސުލްޖުމްހޫރިއްޔާ ވަނީ، ރައީސުލްޖުމްހޫރިއްޔާ ވަނީ، އިޖްތިމާޢީ-އިޤްތިޞާދީ ތަރައްޤީގެ އެކި ދާއިރާތަކުން ތުރުކީވިލާތުން ރާއްޖެއަށް ވެދެއްވަމުން ގެންދަވާ އެއްބާރުލެއްވުން ފާހަގަކުރައްވައި، އެކަމަށްޓަކައި، އެ ޤައުމުގެ ރައީސް އުރުދުޣާނަށާއި، ތުރުކީވިލާތުގެ ރައްޔިތުންނަށް ވަރަށް އިޚްލާޞްތެރިކަމާއެކު ޝުކުރު އަދާކުރައްވާފައެވެ.

މިބައްދަލު ކުރެއްވުމުގައި ތުރުކިޔޭގެ ރައީސް، ރަޖަބް ޠައްޔިބް އުރްދުޣާން ދދެއްކެވި ވާހަކަފުޅުގައި، ރިޔާސީ އިންތިޚާބުގައި ޑރ. މުއިއްޒު ހޮއްދެވި ކާމިޔާބަށާއި، ފުރަތަމަ ފުރަމާނަ ދަތުރުފުޅުގައި ވަޑައިގަންނަވާ ޤައުމަކަށް ތުރުކިޔޭ ޚިޔާރު ކުރެއްވުމުން އެކަމަށް މަރުޙަބާ އާއި ޝުކުރުދެންނެވިއެވެ. އަދި ރައީސް، ޑރ. މުޢިއްޒުގެ މި ދަތުރުފުޅުގެ ސަބަބުން، ތުރުކީވިލާތާއި ދިވެހިރާއްޖެއާ ދެމެދު އޮތް ގުޅުމުގެ އާ ބާބެއް ފެށުމަށް މަގުފަހިވެގެންދާނެކަން ޔަޤީން ކުރައްވާ ކަމުގައި ތުރުކީވިލާތުގެ ރައީސް ރަޖަބް ޠައްޔިބް އުރްދުޣާން ވިދާޅުވިއެވެ.

ރައީސުލްޖުމްހޫރިއްޔާ، ޑރ. މުއިއްޒު، ތުރުކިޔޭއަށް ކުރައްވާ މިދަތުރުފުޅަކީ، މިމަހުގެ 26 އިން 29އަށް ކުރައްވާ ރަސްމީ ދަތުރުފުޅެކެވެ. މިއީ އެމަނިކުފާނު ވެރިކަމާއި ހަވާލުވެވަޑައިގެންނެވުމަށްފަހުގައި ޤައުމުން ބޭރަށް ކުރެއްވި ފުރަތަމަ ފުރަމާނަ ދަތުރުފުޅެވެ.