މާލޭ ސިޓީގެ މޭޔަރު ހޮވުމަށް ބާއްވާ ބައި-އިލެކްޝަން އަންނަ ޖެނުއަރީ މަހުގެ 13 ވަނަ ދުވަހު ބާއްވަން ނިންމާފައިވާކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.

މާލޭ ސިޓީގެ މޭޔަރަކު ހޮވުމަށް ބައި-އިލެކްޝަން ބާއްވަނީ އެމަޤާމުގައި ހުންނެވި ޑރ. މުހައްމަދު މުއިއްޒު ކުރިއަށް އޮތް 5 އަހަރަށް ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވެވަޑައިގެން މޭޔަރުކަމުގެ މަޤާމުން އިސްތިއުފާ ދެއްވުމުންނެވެ. މާލޭ ސިޓީގެ ކައުންސިލްގެ މޭޔަރުގެ ގޮނޑި ހިމެނޭހެން ޖުމްލަ 4 ގޮނޑިއެއް ވަނީ ހުސްވެފައެވެ.

ދައުލަތުގެ މީޑިއާގައި ވާހަކަދައްކަވަމުން އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ، މާލޭ ސިޓީގެ މޭޔަރު ހޮވުމަށް ބާއްވާ އިންތިހާބު ޖެނުއަރީ މަހުގެ 13 ވަނަ ދުވަހު ބޭއްވުމަށް މިހާރު ނިންމާފައިވާކަމަށެވެ. މި އިންތިހާބުގައި ވާދަކުރަން ބޭނުންވާ ފަރާތްތަކަށް ނޮވެމްބަރ 28 އިން ޑިސެމްބަރ މަހުގެ 13 ވަނަ ދުވަހުގެ ނިޔަލަށް އެ ފުރުސަތު ހުޅުވާލާނެކަމަށް ހަބީބް ވިދާޅުވިއެވެ.

"މާލޭ ސިޓީ މޭޔަރާއި، މާލޭ ސިޓީ ކައުންސިލްގެ 3 މެންބަރުންނާއި، އަދި ވ.ރަކީދޫ ކައުންސިލްގެ މެންބަރަކާއި އަދި ހަމައެއާއިއެކީގައި ޑަބްލިއުޑީސީގެ 18 ރަށެއްގެ މެންބަރުން އިންތިހާބު ކުރުމަށްޓަކައި ބާއްވާ ބައި އިލެކްޝަން އަޅުގަނޑުމެން މި ޖަނަވަރީ މަހުގެ 13 ވާ ހޮނިހިރު ދުވަހު ބާއްވާ ގޮތަށް ކޮމިޝަންގެ ރަސްމީ ޖަލްސާއިން ވަނީ ނިންމާފައި" ކަމަށް ހަބީބް ވިދާޅުވިއެވެ.

ހަބީބް ވިދާޅުވީ، ބައި-އިލެކްޝަންގައި ބައިވެރިވުމުގެ ފުރުސަތު ނޮވެމްބަރ 28 ވަނަ ދުވަހުގެ ހެނދުނު 9 އަކުން ފެށިގެން ޑިސެމްބަރ މަހުގެ 13 ވަނަ ދުވަހުގެ 14:00 އައި ހަމައަށް އޮންނާނެކަމަށެވެ. ޖެނުއަރީ 13 ވަނަ ދުވަހު އިންތިހާބު ބޭއްވުމަށްފަހު 2 ދުވަހެއްގެ ތެރޭގައި ދާއިމީ ނަތީޖާ އިއުލާންކުރެވޭނެކަމަށެވެ. އެއީ ޖަނަވަރީ 15 ވަނަ ދުވަހެވެ.