ރައީސް ޑރ.މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ ބައެއް މިނިސްޓަރުންނަށް ރުހުން ނުދޭން އިދިކޮޅު އެމްޑީޕީން މަޝްވަރާ ކޮށްފިއެވެ.

މި ސަރުކާރުގެ ކެބިނެޓުގެ 5 މިނިސްޓަރަކަށް ރުހުން ނުދޭން އެމްޑީޕީން ވަނީ މަޝްވަރާ ކޮށްފައެވެ. އޭގެ ތެރެއިން 2 މިނިސްޓަރަކަށް ރުހުން ނުދިނުމަށް ޕީޖީ ގްރޫޕް އިއްތިފާގުވެފައިވާކަމަށް މައުލޫމާތު ލިބެއެވެ. ނަމަވެސް އެއީ ކޮން މިނިސްޓަރުންނެއްކަމެއް ހާމަކޮށްފައެއް ނުވެއެވެ.

ރައީސް މުއިއްޒުގެ ސަރުކާރުގައި 22 ވަޒީރުން ތިއްބަވައެވެ. އެ ބޭފުޅުންނަށް ރުހުން ދިނުމުގެ މައްސަލަ މިހާރު އޮތީ ރައްޔިތުންގެ މަޖިލީހުގެ ކަމާ ބެހޭ ކޮމިޓީ ގައެވެ. 

Advertisement

އެމްޑީޕީން ރޭ ބޭއްވި ބައްދަލުވުމުގައި ވަނީ އަންނަ އަހަރަށް ލަފާކޮށް ހުށަހެޅި ބަޖެޓަށް ބަދަލުތަކެއް ގެނައުމަށްވެސް މަޝްވަރާކޮށްފައެވެ.

މަޖިލީހުގެ ބަޖެޓު ދިރާސާ ކުރާ ކޮމިޓީ އަަށް ހުށަހަޅަން ފެންނަ ބަދަލުތަކުގެ ތެރޭގައި ރައީސް މުއިއްޒު އެދިވަޑައިގެން ފުށި ދިއްގަރު ހިއްކުމަށް ހިމަނާފައިވާ 400 މިލިއަން ރުފިޔާ ސަރުކާރުގެ އެހެނިހެން ހައުސިން މަޝްރޫއުތަކަށް އެލޮކޭޓުކުރުން ހިމެނެއެވެ.

މަޖިލީހުގައި އެމްޑީޕީގެ 55 ގެ މެމްބަރުން ތިއްބަވައެވެ. އެއީ މަޖިލީހުގެ މެޖޯރިޓީ ކަމަށް ވާތީ ވަޒީރަކަށް ރުހުން ނުދޭން ފާސްކުރުމުގެ ބާރު އެޕާޓީއަށް އެބައޮތެވެ.