ކުރީގެ ރައީސް އަދި ޕީޕީއެމްގެ ކުރީގެ ރައީސް އަބްދުﷲ ޔާމީން އުފައްދަވަން އުޅުއްވާ 'ޕީޕަލްސް ނޭޝަނަލް ފްރަންޓް' އުފައްދަން އިލެކްޝަންސް ކޮމިޝަން (އީސީ)އަށް މިއަދު ފޯމު ހުށަހަޅުއްވައިފިއެވެ.

ޔާމީންގެ ފަރާތުން އީސީއަށް ފޯމު ހުށަހެޅުއްވި ޓީމުގައި އިސްކޮށް ތިއްބެވީ އެ މަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލް އަހުމަދާއި ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް އަލީ ޖަމާލެވެ. އެ ބޭފުޅުންނާ އެކު ޔާމީންއަށް ތާއީދުކުރައްވާ، ޕީޕީއެމްގައި ކުރިން އުޅުއްވި ބައެއް ބޭފުޅުން ވެސް ބައިވެރިވެވަޑައިގެންނެވިއެވެ.

ޔާމީން ވަނީ މިދިޔަ ބުރާސްފަތި ދުވަހުގެ ރޭ އެ މަނިކުފާނު ރައީސްކަން ކުރައްވަމުން ގެންދެވި ޕީޕީއެމް އިން ވަކިވެވަޑައިގެންފައެވެ. އަދި ރޭވަނީ އަލަށް އުފައްދާ ޕާޓީގެ ނަމާއި، ކުލަ އަދި ލޯގޯ ދައްކާލާފައެވެ.

އެ މަނިކުފާނުގެ އިސް ވަކީލު، ޖަމީލް ވިދާޅުވެފައިވާ ގޮތުގައި، ރައީސް ޔާމީން ޕީޕީއެމް އިން ވަކިވެވަޑައިގަންނަވަން ނިންމެވީ އެ ޕާޓީގެ ހަރަކާތްތައް ހިންގުމަށް ޕާޓީގައި އިސްކޮށް ތިއްބެވި ބޭފުޅުން ބޭނުންފުޅު ނުވުމާއި އެ މަނިކުފާނުގެ މަޝްވަރާ އާއި ލަފާ ވެސް އެ ބޭފުޅުން މިހާރު ބޭނުންފުޅު ނުވާތީ ކަމަށެވެ.